Լաուրա Սարգսյան, Sputnik.
««Բերդ» հայկական ազգային պարը գեղեցիկ հարսանիքի ժամանակ» անվանումով տեսանյութը, որը հրապարակվել է Facebook-ի խմբերից մեկում, վեճի թեմա է դարձել, և հայերն ու վրացիները իսկական «պատերազմ» են սկսել մեկնաբանությունների տեսքով։ Երկու կողմն էլ փորձում է ապացուցել, որ դա իրենց ազգային պարն է։
Վրացի օգտատերերին չի համոզում նույնիսկ Facebook-ի հայ օգտատերների պատասխանը, որոնք որպես ապացույց «Բերդ» պարի մի շարք տեսանյութեր են ներկայացրել։
Պարզվում է` այս փաստարկն էլ ազդեցիկ չէ, մեկնաբանությունների ալիքը գնալով մեծանում է։ Տեսանյութում երիտասարդների խումբն իսկապես պարում է հայկական ազգային «Բերդ» պարը, բայց ոչ թե հայկական, այլ վրացական երաժշտության ներքո։
Ու հենց սա էլ շփոթմունքի պատճառ է դարձել. վրացիներից շատերն, ասես, մոռացել են, թե ինչպես են իրականում պարում «Դաիսին»։
«Դաիսիի» շուրջ հայ-վրացական վեճ էր ծագել նաև անցյալ տարի։ Այն ժամանակ Youtube-ի օգտատերերից մեկը «Հայկական հարսանեկան պար։ Գևորգյան պարի ակադեմիա։ ԱՄՆ» անվանումով տեսանյութ էր հրապարակել, որը տարածվել էր Facebook-ում։ Որոշ մեկնաբանություններում կատարողներին մեղադրում էին գողություն մեջ, և ինչպես այս անգամ, այն ժամանակ էլ անպարկեշտ արտահայտություններ էին հնչում։
Թեմային էր անդրադարձել նաև վրացական GDS (Georgian Dreams Studio) հեռուստաընկերությունը և ԱՄՆ-ում գործող Գևորգյան պարի ակադեմիային մեղադրել էր վրացական ժառանգությունը յուրացնելու մեջ։
Տեսանյութում իսկապես երևում էր, որ Վարդան և Սիրանուշ Գևորգյանները պարում են «Դաիսի» վրացական ազգային պարը Զախարիա Պալիաշվիլու օպերայից։ Եթե օգտատերն այն ժամանակ սխալմունքով պարը հայկական էր անվանել, ապա այս անգամ սխալմունք չի եղել։ Ոչ ոք նույնիսկ չի հավակնել հայկական անվանել այն երաժշտությունը, որի տակ պարում են «Բերդ» պարը։
Գևորգյան ակադեմիան այն ժամանակ բացատրական բաց նամակ էր գրել` ներողություն խնդրելով երրորդ կողմից։ Սակայն դեռ պարզ չէ, թե ով է հիմա ներողություն խնդրելու հայերի և Հայաստանի հասցեին սոցցանցում հնչող անպարկեշտ մեկնաբանությունների համար։
