ԵՐԵՎԱՆ, 6 սեպտեմբերի — Sputnik. Սեպտեմբերի 6-ի, ժամը 17.30-ի դրությամբ ՀՀ Արագածոտնի մարզում՝ Բյուրականի մոտակա բուսածածկ տարածքում բռնկած հրդեհի մարման աշխատանքները շարունակվում են: Տեղում գործում է հրդեհաշիջման շտաբ, որը ղեկավարում է ՀՀ ԱԻՆ ՓԾ տնօրեն, փ/ծ գնդապետ Մ.Ղազարյանը: Այս մասին հայտնում է ՀՀ ԱԻՆ մամուլի ծառայությունը։
Տարածքում առկա են թե կրակի, թե ծխացող օջախներ: Աշխատանքներ են տարվում հրդեհի օջախների մեկուսացման և մարման ուղղությամբ: Մերձակա բնակավայրերին վտանգ չի սպառնում:
Հրդեհաշիջման գործողություններին աջակցում են հարակից Բյուրական, Անտառուտ և Օրգով գյուղերի բազմաթիվ բնակիչներ: Կիրառվում են հրշեջ մեքենաներ, դյուրակիր ջրատարներ և այլ պարզունակ միջոցներ (բահեր, խոնավ լաթեր և այլն):
Բյուրական գյուղի մոտակա բուսածածկ տարածքում հրդեհը բռնկել էր սեպտեմբերի 3-ին։
