ԵՐԵՎԱՆ, 3 սեպտեմբերի-Sputnik. ՌԴ արտգործնախարարությունը Սան Ֆրանցիսկո քաղաքում Ռուսաստանի Դաշնության գլխավոր հյուպատոսարան, ինչպես նաև Վաշինգտոնում ու Նյու Յորքում գտնվող առևտրային ներկայացուցչություններ ներխուժելը և առգրավելը գնահատում է որպես վրեժխնդիր գործողություն և միջազգային իրավունքի կոպտագույն խախտում: Այս մասին հաղորդում է ՌԻԱ Նովոստին:
Արդյունքում՝ Պետդեպի պահանջով դիվանագիտական շինությունները փոխանցվել են ամերիկյան կողմին:
Լրատվամիջոցի փոխանցմամբ՝ ՌԴ ԱԳՆ-ից հաղորդագրություն է տարածվել, հորդորով, որ ամերիկյան իշխանություններն անմիջապես վերադարձնեն ռուսական դիվանագիտական շինությունները: Հակառակ դեպքում, ըստ ՌԴ ԱԳՆ-ի, երկու երկրների միջև հարաբերությունների դեգրադացիայի մեղավորությունը կկրի ամերիկյան կողմը:
«Այդ հարաբերություններից է մեծապես կախված գլոբալ կայունությունն ու միջազգային անվտանգությունը»,-ասված է հաղորդագրության մեջ:
Տեղեկացնենք, որ ավելի վաղ ԱՄՆ պետդեպը պահանջել էր փակել Սան Ֆրանցիսկոյում Ռուսաստանի Դաշնության գլխավոր հյուպատոսարանը և դադարեցնել Վաշինգտոնում առևտրային ներկայացուցչության ու Նյու Յորքում դրա մասնաճյուղի գործունեությունը:
Թեմային անդրադարձել է նաև ՌԴ ԱԳՆ մամուլի խոսնակ Մարիա Զախարովան՝ տեղի ունեցածն անվանելով «ապօրինի, անիմաստ խեղկատակություն»:
«Ցանկանում էիք կոտրել կողպեքներն ու դռները: Մենք բարեկիրթ մարդիկ ենք, ինքներս կբացենք, ինչու փչացնել մեր ունեցվածքը»,-իր ֆեյսբուքյան էջում գրել է Զախարովան:
