ԵՐԵՎԱՆ, 2 սեպտեմբերի — Sputnik. ՀՀ Վարչապետ Կարեն Կարապետյանն իր և կառավարության անունից ջերմորեն շնորհավորել է հայրենակիցներին Արցախի Հանրապետության անկախության 26-րդ տարեդարձի կապակցությամբ: Այս մասին հայտնում է ՀՀ կառավարության մամուլի ծառայությունը։
«Խոնարհվում ենք Արցախի անկախության ու ազատության համար մարտնչած հերոսների առջև»,- ասել է Կարեն ԿԱրապետյանը:
Ըստ վարչապետի` նրանց անձնվիրությունը մեզ պարտավորեցնում է ամենօրյա աշխատանքով ամրապնդել մեր հաղթանակները, ուժեղացնել մեր անվտանգությունն ու մարտունակությունը և առաջ շարժվել մեր ընդհանուր ազգային նպատակների իրականացման լավատեսական ձգտումներով:
«Հայաստանի կառավարությունը միշտ կանգնած է Արցախի կողքին ու պատրաստ է հնարավորինս աջակցել ու սատարել տնտեսական զարգացմանը վերաբերող ծրագրերի իրականացման հարցում»,- նշված է վարչապետի ուղերձում:
Կարեն Կարապետյանը Արցախի մեր հայրենակիցներին մաղթել է խաղաղություն, առաջընթաց և նորանոր հաջողություններ:
