ԵՐԵՎԱՆ, 31 օգոստոսի — Sputnik. «Արարատ» ֆուտբոլային ակումբի նախագահ Վալերի Հովհաննիսյանի հրաժարականից հետո ֆինանսական ստուգում է անցկացվել, որը ցույց է տվել` ակումբի հաշվից 20 միլիոն ռուբլի է անհետացել, հայտնել է «Արարատ» ֆուտբոլային ակումբի տեղեկատվական քաղաքականության գծով փոխնախագահ Անդրանիկ Քերոբյանը։
«Երեկ Վալերի Հովհաննիսյանը հրաժարական է գրել` հիմնավորելով այն առողջական վիճակով։ Մեզ հայտնի դարձավ, որ նա Վրաստան է մեկնել։ Դրանից հետո ֆինանսական ստուգում նշանակվեց։ Այն այսօր ցույց տվեց, որ ակումբի հաշվից 20 միլիոն ռուբլի է անհետացել` առանց համապատասխան փաստաթղթերի։ Ֆինանսիստների անցկացրած ստուգումը ցույց է տվել, որ գումարը հանվել է Վալերի Հովհաննիսյանի հաշվից։ Ակումբը դիմել է իրավապահ մարմիններին», – Sputnik Արմենիային հայտնել է Քերոբյանը։
Քննչական մարմինները սկսել են նախաքննչական ստուգումներ իրականացնել։
Օգոստոսի 30–ին հայտնի է դարձել, որ Հովհաննիսյանը լքել է պաշտոնը` առողջական խնդիրների պատճառով։
