ԵՐԵՎԱՆ, 31 օգոստոսի — Sputnik. Ռուսաստանում դատապարտված և Հայաստան տեղափոխված հայ վարորդ Հրաչյա Հարությունյանն այսօրվանից պատիժը կկրի բաց ռեժիմով: Այս մասին Sputnik Արմենիային տեղեկացրեց «Քրեակատարողական հիմնարկների վարչության մամուլի պատասխանատու Գոռ Ղլեչյանը:
Հարությունյանն այսօր առավոտյան տեղափոխվել է կալանքը բաց ռեժիմով կրողների համար նախատեսված տեղամաս:
Աշխատանքի իրավունք ստանալու համար նա դիմում–նամակ պետք է ներկայացնի համապատասխան քրեակատարողական հիմնարկ։
Այդպիսի թույլտվություն ստանալու դեպքում Հարությունյանը կարող է աշխատել ցերեկային ժամերին, իսկ երեկոյան վերադառնալ քրեակատարողական հիմնարկ։
Հիշեցնենք, որ Հրաչյա Հարությունյանն իր «Կամազ» մակնիշի մեքենայով 2013-ի հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսի, ինչի հետևանքով զոհվել էր 18 մարդ։ Նա դատապարտվել էր 6 տարի և 9 ամիս ազատազրկման:
Դատավճռի համաձայն` Հրաչյա Հարությունյանը մեղավոր է ճանաչվել երկու հոդվածով` ճանապարհային երթևեկության և տրանսպորտային միջոցների շահագործման կանոնների խախտում, որն առաջացրել է ծանր հետևանքներ, և կեղծ փաստաթղթի օգտագործում:
2017թ.–ի հուլիսի 20–ին նա տեղափոխվել է ՀՀ՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով՝ պատժի մնացած մասը՝ 2 տարի 9 ամիսը Հայաստանում կրելու համար:
