ԵՐԵՎԱՆ, 31 օգոստոսի — Sputnik. ԵԱՀԿ երևանյան գրասենյակն այսօր` օգոստոսի 31-ին, դադարեց իր գործունեությունը Հայաստանում։ Այս մասին հաստատել է կազմակերպության մամուլի ծառայությունը։
ԵԱՀԿ երևանյան գրասենյակի մանդատի երկարաձգման շուրջ համաձայնության հասնել չի հաջողվել՝ պայմանավորված Ադրբեջանի դիրքորոշմամբ, որը թե՛ մինչև փակվելը, թե՛ գրասենյակի աշխատանքները երկարաձգելու փորձերին առարկում էր՝ ասելով, որ, իբր ԵԱՀԿ-ն Երևանի գրասենյակը ընդլայնել է իր մանդատը և այն արդեն տարածվում է արցախյան հակամարտության վրա:
«Այսօր մեր վերջին աշխատանքային օրն է։ Տխուր է», — ֆեյսբուքյան իր էջում գրել է գրասենյակի մամուլի քարտուղար Գոհար Ավագյանը։
Ավելի վաղ ԵԱՀԿ գլխավոր քարտուղար Լամբերտո Զանիերը նշել էր, որ ԵԱՀԿ-ն կշարունակի օգնել Հայաստանին ընտրությունների անցկացման հարցում։ Կան նաև բազմաթից կարևոր հարցեր, որոնք դեռ ընթացքի մեջ են։ Հայաստանի իշխանությունները նույնպես հայտնել են, որ չնայած գրասենյակի փակմանը, մտադիր են ԵԱՀԿ-ի հետ բարձր մակարդակի համագործակցություն պահպանել։
Հայաստանը Հարավային Կովկասում միակ երկիրն էր, որտեղ ԵԱՀԿ-ի գրասենյակ էր գործում։ Բաքվում 2000 թվականին բացված կազմակերպության գրասենյակը դադարեցրել էր գործունեությունը 2014 թավականի հունվարի 1-ին։ 1992 թվականին Թբիլիսիում բացված ԵԱՀԿ առաքելության ժամկետը լրացել է 2008 թվականի դեկտեմբերի 31-ին։
