ԵՐԵՎԱՆ, 31 օգոստոսի — Sputnik. «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի գիտահետազոտական բաժնի առաջատար գիտաշխատող, հնամարդաբան Հասմիկ Սիմոնյանը մասնակցել է Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումների (արշավախմբի ղեկավար` պ.գ.թ. Նժդեհ Երանյան) ընթացքում բացված մարդաբանական նյութերի պեղման, մաքրման և նախնական ուսումնասիրման աշխատանքներին:
![Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ - Sputnik Արմենիա](https://cdn.am.sputniknews.ru/img/847/83/8478399_0:0:999:629_600x0_80_0_0_9511c396967d35715b60c92c1ccf0cab.jpg)
![Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ - Sputnik Արմենիա](https://cdn.am.sputniknews.ru/img/847/83/8478340_0:71:999:700_600x0_80_0_0_08653c4d74434295f71590ed7c344fab.jpg)
![Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ Արցախի Հադրութի շրջանի «Տողի մելիքական ապարանք» պետական պատմամշակութային արգելոցի տարածքում իրականացվող հնագիտական պեղումներ - Sputnik Արմենիա](https://cdn.am.sputniknews.ru/img/847/85/8478546_0:0:1000:629_600x0_80_0_0_51ab404ae6d5060435aa51892efd6614.jpg)
Մարդաբանական նյութերը բացվել են արգելոցի տարածքում գտնվող Սուրբ Հովհաննես եկեղեցու հարավային բակում՝ եկեղեցուն կից շինության պեղման աշխատանքների ժամանակ: Մարդաբանական նյութերը (թվով 8 կմախք) բացվել են քրիստոնեական թաղումներին բնորոշ դիրքով և ուղղվածությամբ. կմախքները դիադրված էին մեջքի վրա, արևմուտք-արևելք կողմնորոշմամբ:
Ըստ Հասմիկ Սիմոնյանի` պեղված բոլոր կմախքների նախնական ուսումնասիրությունից պարզվել է, որ արական սեռի են, հասուն տարիքի:
Սեռատարիքային բնորոշումներն արվել են ըստ նստատեղի և գանգի ոսկրերի: Կատարվել են նաև յուրաքանչյուր կմախքի ողնաշարի ողերի ծանրաբեռնվածության, տարիքային խեղումների, ինչպես նաև`ատամնաախտաբանական բնորոշումներ:
Մարդաբանական նյութերի հետագա ուսումնասիրման համար յուրաքանչյուր կմախքից վերցվել են ԴՆԹ-ի և C14 ռադիոածխածնային անալիզի համար նմուշներ:
Նյութերը հետագայում կենթարկվեն լաբորատոր ուսումնասիրության։