ԵՐԵՎԱՆ, 30 օգոստոսի — Sputnik. Հայտնի ֆուտբոլիստների ավտոշարասյուների ընդլայնմանը երկրպագուներից շատերը հետևում են ոչ պակաս հետաքրքրությամբ, քան նրանց խաղադաշտում ցուցադրած խաղին: Ավտոմեքենաների հանդեպ հատուկ վերաբերմունքով աչքի է ընկնում նաև Հենրիխ Մխիթարյանը, ում ավտոմեքենաների հավաքածուն արդեն հասցրել է հայտնվել է ոչ միայն ֆուտբոլի, այլև ավտոմեքենաների սիրահարների ուշադրության կենտրոնում:
Մխիթարյանի սերը թանկարժեք ավտոմեքենաների հանդեպ սկսվել էր դեռ Դոնեցկում, երբ «Շախտյորում» հանդես գալու տարիներին նա վարում էր Mercedes-Benz CLS 63 AMG լյուքս դասի ավտոմեքենան, որի արժեքը գերազանցում է 100 000 դոլարը:
Դորտմունդի «Բորուսիա» տեղափոխվելուն պես, փոխվեց ոչ միայն Մխիթարյանի ֆուտբոլային ակումբի, այլ նաև ավտոմեքենայի կարգն ու վարկանիշը:
Lamborgini Avendator սպորտային գերարագ ավտոմեքենան՝ միլիոնավոր ավտոսիրողների երազանքը, Հենրիխի համար դարձավ իրականություն, չնայած որ նրանից խլեց գրեթե կես միլիոն դոլար:
Մխիթարյանին հաջողվեց տնտեսել հաջորդ ավտոմեքենայի գումարը, քանի որ հաջորդը որպես նվեր նա ստացավ «Մանչեսթեր Յունայթեդ» ակումբից իրենց շարքերն անցնելու համար։ Ու չնայած որ ավտոմեքենայի արժեքը գրեթե 6 անգամ զիջում էր իր` արդեն ունեցած Lamborgini-ին, այնուամենայնիվ դժվար թե կուլտային ամերիկյան Chevrolet Camaro-ն չուրախացնի որևէ մեկին, այն էլ՝ սպորտային մեքենաների սիրահար Մխիթարյանին:
Ստացվում է, որ յուրաքանչյուր նոր ակումբ իր հետ Հենրիխին բերում է ոչ միայն նոր մարզաշապիկ, այլև նոր ավտոմեքենա: Ու, եթե շարունակի գործել նախկին օրինաչափությունը, ապա Հենրիխը նոր մեքենա կգնի ավելի հզոր թիմ տեղափոխվելու կապակցությամբ կամ նվեր կստանա նոր ակումբի կողմից: