Արմենուհի Մխոյան, Sputnik.
Քարդաշյանների` Գյումրի գալուց մոտ 2 շաբաթ առաջ արդեն «Գյումրի կոմերցիոն կենտրոնի» «Նանե» հյուրանոցի տնօրիունությունը տեղյակ էր այցի մասին, բայց այնպիսի գաղտնիություն էր ապահովել, որ նույնիսկ նրանք, ովքեր սպասարկելու էին հյուրանոցային սենյակը, «թանկարժեք» հյուրի մասին իմացան միայն այցի օրը: Ըստ համաձայնության՝ գաղտնի էր պահվել ամեն ինչ՝ սկսած հյուրանոցային սենյակից մինչև ճաշացանկ:
«Հայկական ուտեստներ էին, հիմնականում` Գյումրվա կերակուրներ՝ ավելուկով սալաթ, շիրակյան պանրի տեսակներ, տոլմաներ, փախլավա, գաթա, իսկ փոքրիկին հատկապես դուր էր եկել հայկական հացը»,- Sputnik Արմենիայի թղթակցին տեղեկացրին հյուրանոցի տնօրինությունից:
Էլ ի՞նչ Քիմ Քարդաշյան առանց շոուի։ Հյուրանոցում մնալու ամենաերկար ժամանակն անցկացվեց թոք-շոուն նկարելու համար: Նկարահանումներն իրականացվեցին կենտրոնի «Շարա» ռեստորանում:
«Փորձել էինք ապահովել բոլոր պահանջները, որոնք նախապես ներկայացրել էր Քարդաշյանների այցով զբաղվող երևանյան տուրիստական ընկերությունը։ Մի քանի անգամ տարբեր ընկերությունների ներկայացուցիչներ այցելեցին` համոզվելու համար, որ ամեն ինչ նորմալ է թե՛սպասարկման, թե՛ որակի, թե՛ անվտանգության առումով», — պատմեցին հյուրանոցում:
Տնօրինությունից վստահեցրին՝ մինչև այսօր էլ կան հյուրեր, որոնք ուզում են մնալ այն սենյակում, որտեղ եղել են Քարդաշյանները:
Ի դեպ, Քարդաշյանների այցը հավաստող որևէ լուսանկար չկա ո՛չ հյուրանոցային համարում, ո՛չ էլ ընդհանրապես հյուրանոցում. այդպես էր պահանջել ընկերությունը: Միայն հյուրերի արձագանքների գրքում պահպանվել է Քարդաշյանների շնորհակալական խոսքը` հյուրանոցի սպասարկման և համեղ ուտեստների համար:
Հյուրանոցում պատմում են` Քարդաշյաններն իրենց անչափ համեստ էին պահում: «Քիմը չափազանց խոնարհ էր, նույնիսկ հագուկապն էր համեստ, ու ոչ մեկը չէր ասի, որ դա Քարդաշյանն է: Քլոեն ավելի շատ էր աչքի ընկնում: Ոչ մի արտասովոր պահանջ կամ ցանկություն չունեին, շատ սովորական մարդիկ էին: Բարեհամբույր ու ջերմ էին բոլորը աշխատակիցների հետ, շենքում եղած ժամանակ մենք ոչ մի լարվածություն չենք ունեցել, ամեն ինչ շատ հանգիստ է անցել»,- նշում է հյուրանոցի ավագ մենեջեր Արմինե Եղոյանը, որը հենց այդ օրը եղել է սենյակի սպասարկման պատասխանատուն:
Հիշեցնենք, որ Քարդաշյանների հայտնի ընտանիքը Հայաստան էր ժամանել 2015 թվականի ապրիլին: Քիմն ու նրա ընտանիքի անդամներն այցելել էին տարբեր վայրեր, եղել նաև Հայոց ցեղասպանության հուշահամալիրում և հարգանքի տուրք մատուցել անմեղ զոհերի հիշատակին: Քարդաշյանների այցը մեծ ուշադրության էր արժանացել նաև համաշխարհային մամուլում. տարբեր պարբերականներ և թերթեր անդրադարձել էին Հայոց ցեղասպանության թեմային:
