ԵՐԵՎԱՆ, 28 օգոստոսի — Sputnik, Գոհար Սարգսյան. Երևանի համար վարակիչ է դարձել Ենոքավանի օրինակը։ Տավուշի գողտրիկ անկյունում զարգացրին էքստրեմալ զբոսաշրջությունը, ստեղծեցին զիփլայն, հիմա էլ պատրաստում են այն «երկարացնել», հասցնել 3.2 կմ-ի, որպեսզի Հայաստանն ունենա աշխարհի ամենաերկար զիփլայնը։
Երևանը տեսավ Ենոքավանի հաջողությունները և ընդօրինակեց։ Թաղապետարան-քաղաքապետարան-մասնավոր եռակողմ քննարկումն իր պտուղները տվեց։ Երևանյան առաջին զիփլայնը կգործի հոկտեմբերի վերջից։ Sputnik Արմենիայի հետ զրույցում մանրամասներ ներկայացրեց Արաբկիր վարչական շրջանի ղեկավարի խորհրդական Արամ Գրիգորյանը։
«Նախատեսվում է միջինը 850 մ երկարությամբ թռիչք Արաբկիր զբոսայգուց, Դավթաշենի կամրջի տակով մինչև Ֆիզիկայի ինստիտուտի հարակից տարածք»,-պատմեց Գրիգորյանը։
Աշխատանքներն այսքանով չեն սահմանափակվի։ «Արաբկիր» զբոսայգին կվերածվի զվարճանքների կենտրոնի։ Այգին կունենա մանկական հրապարակ, գրադարաններ, այստեղ զբաղվելու են յոգայով և նկարչությամբ։
«Բացի այդ, այգում անցկացվելու է ոռոգման ցանց, որը նախատեսված է իրականացնել կաթիլային համակարգով, լուսավորության հարցն է լուծվելու։ Ամենակարևորը` այստեղ հիմնական շինություններ չեն լինելու։ Ամբողջությամբ կառույցը լինելու է թեթև կոնստրուկցիաներով, ինչն անհրաժեշտության դեպքում հնարավորություն է տալու 1-2 օրվա ընթացքում ամբողջությամբ հավաքել»,- ասաց Արաբկիր վարչական շրջանի ղեկավարի խորհրդականը։
Գրիգորյանը հատուկ շեշտեց, որ բոլոր ծառայությունները մատչելի են լինելու հանրության համար։ Այդ թվում` սոցիալապես անապահով անձանց համար ընթանալու են բացօթյա կինոդիտումներ։
