ԵՐԵՎԱՆ, 27 օգոստոսի — Sputnik. Մառա Բաղդասարյանը հայտնի է մոսկոյան փողոցներում ունեցած արկածներով. 23-ամյա աղջիկը բազմաթիվ անգամ է ոստիկանության բաժանմունքում հայտնվել իր Gelаndewagen-ով սլանալու պատճառով:
Բայց ո՞ւր է անհետացել Մառան: Գուցե արկածների հանդեպ կիրքն ու մեծ արագությամբ սլանալու մոլուցքն արդեն անցյալո՞ւմ են մնացել: Ժամանակին համացանցում մեծ ակտիվություն դրսևորող աղջիկն արդեն ավելի քան մեկ ամիս է՝ ոչինչ չի հրապարակում սոցցանցերում:
Ոչ մանկական խաղեր
Մառան հայտնի գործարար Էլմար Բաղդասարյանի դուստրն է: Մեքենա վարելու սերը հայտնաբերել է դեռ վաղ հասակում: Ծնողներն ամուսնալուծվել են, բայց այդ հանգամանքը չի խանգարել, որ նա լիարժեքորեն վայելի կյանքը:
Բաղդասարյանը մեքենան վարելու հմտություններին շատ լավ է տիրապետում, քանի որ փոքրուց զբաղվել է քարթինգով, բայց երբ նստում է ղեկի դիմաց, ասես մոռանում է երթևեկության կանոնների մասին: Մառա Մերսեդեսովան (հաճախ այսպես են անվանում նրան) միայն 2015 թվականի ընթացքում մոտավորապես 150 տուգանք է ստացել: Ընդ որում՝ նույն խախտումների համար:
«Պուտին, օգնիր»
2017 թվականի հունիսին նա դատարանի աշխատակիցների դեմ բողոք ներկայացրեց Ռուսաստանի նախագահ Վլադիմիր Պուտինին: Ավելի ուշ նրա փաստաբանը հայտարարեց՝ աղջկան սպառնում են, ասում են՝ ամեն դեպքում Մառային ձերբակալելու են:
Այս տարվա մայիսին դատարանը Մառային զմահ զրկեց վարորդական իրավունքից:
Դատական նիստերի ընթացքում դեմքը փակող աղջիկն այդ դատական նիստին ընդհանրապես չհայտնվեց: Նրա շահերը ներկայացնում էին հայրն ու փաստաբանը:
Մառան աշխատանքի անցավ հոր մոտ: Մենեջերի պաշտոն ստացավ ու սկսեց զբաղվել… երշիկի վաճառքով: Աշխատավարձը՝ 50 հազար դրամ, որի 15 տոկոսը կմարի երթևեկության կանոնների խախտման համար կուտակած տուգանքները:
Վերջին «հարվածը» եղավ այն, որ վարորդական իրավունքից զրկված Մառա Բաղդասարյանին այս տարվա հուլիսին կրկին հայտնաբերեցին ղեկի դիմաց:
Մառայի նախկին շքեղ կյանքը հանկարծ չքվեց սոցիալական ցանցերից: Վերացան փառահեղ մեքենաների, մուշտակների նկարները. աղջիկն,ասես, ընդհատակ անցավ: Ինչո՞վ է զբաղվում, հայտնի չէ. գուցե երշիկի բիզնեսո՞վ, իսկ գուցե ադրենալինի նոր չափաբաժի՞ն է պատրաստում ճանապարհային ոստիկանների համար:
