ԵՐԵՎԱՆ, 27 օգոստոսի — Sputnik. Հայաստանի ծանրամարտի ֆեդերացիայի գլխավոր քարտուղար, Հայաստանի ազգային հավաքականի գլխավոր մարզիչ Փաշիկ Ալավերդյանը ՀԱՕԿ-ի հետ զրույցում ամփոփել է իր սաների՝ ծանրամարտիկներ Սիմոն Մարտիրոսյանի, Գոռ Մինասյանի և Անդրանիկ Կարապետյանի մասնակցությունը:
«Շնորհավորում եմ բոլորիս, մեր ժողովրդին, որ նրանց զավակները դարձան Համաշխարհային ուսանողական խաղերի նման խոշոր մրցման չեմպիոններ և արծաթե մեդալակիր: Ես մեկնելուց առաջ ասել էի, որ դատարկաձեռն չենք վերադառնա Թայվանից: Խոստումը կատարեցինք: Ասել էի նաև, որ Ունիվերսիադան Անդրանիկ Կարապետյանի համար յուրատեսակ փորձամրցում է լինելու ծանր վնասվածքից հետո և աշխարհի առաջնությունից առաջ: Անդրանիկը, փառքով դուրս եկավ փորձությունից: Կեցցե՛ նա: Նրա մասնակցությունից հետո ես ուրախությունից թաքուն արտասվում էի»,ճ ասել է Ալավերդյանը:
Նրա խոսքով՝ Սիմոն Մարտիրոսյանն ու Գոռ Մինասյանը բարձրացրին այնքան, որքան անհրաժեշտ էր հաղթելու համար. այդպես էին պլանավորել, քանի որ առջևում Եվրոպայի երիտասարդական և աշխարհի մեծահասակների առաջնություններն են:
Նշենք, որ 29-րդ համաշխարհային ուսանողական խաղերում ծանրամարտիկներ Սիմոն Մարտիրոսյանն ու Գոռ Մինասյանը դարձան չեմպիոն, իսկ Անդրանիկ Կարապետյանը, ծանր վնասվածքից հետո մասնակցելով պաշտոնական մրցմանը, արծաթե մեդալ նվաճեց:
