ԵՐԵՎԱՆ, 25 օգոստոսի – Sputnik. Այս մրցաշրջանում Հենրիխ Մխիթարյանը նկատելի առաջընթաց կգրանցի։ ESPN–ին տված հարցազրույցում այսպիսի կարծիք է հայտնել հայ ֆուտբոլիստի թիմակից, շվեդ հարձակվող Զլատան Իբրահիմովիչը։
«Կարծում եմ` սա կլինի Մխիթարյանի մրցաշրջանը: Այս մրցաշրջանը պարզապես հիասքանչ է սկսել: Մարդիկ թերագնահատում են նրան, քանի որ աշխարհում չունի այնպիսի բարձր համբավ, ինչպիսին ունեն մյուս ֆուտբոլիստները: Սա, գուցե, այն պատճառով է, որ նա եկել է փոքր երկրից, բայց այս տարի Մխիթարյանը կստանա այն վստահությունը, որին արժանի է: Ես խաղադրույքս կատարում եմ Մխիթարյանի վրա», – ասել է շվեդ ֆուտբոլիստը։
Ընդ որում` Իբրահիմովիչը կատակել է, որ եթե Մխիթարյանը նրան գոլային փոխանցումներ չկատարի, ուրեմն` չի խաղա։
ԱՊԼ-ի նոր մեկնարկած առաջնության երկու տուրերում Մխիթարյանն արդեն 4 գոլային փոխանցման հեղինակ է դարձել:
