ԵՐԵՎԱՆ, 25 Օգոստոս — Sputnik. Այսօր, ժամը 11։40-ի սահմաններում Երևանի Նաիրի Զարյան փողոցի և Ազատության պողոտայի խաչմերուկում տեղի է ունեցել ավտովթար։ Բախվել են 62-ամյա Բորիս Պողոսյանի վարած Volkswagen մակնիշի 493 ԼV 61 համարանիշի և 61-ամյա Սամվել Մկրտչյանի վարած ГАЗ 32213 մակնիշի 46 57 Տ համարանիշի ավտոմեքենաները։ Այս մասին տեղեկացնում է Shmshyan.com–ը։
Վթարի հետևանքով Volkswagen-ից 3 մարդ մարմնական վնասվածքներով տեղափոխվել են հիվանդանոց։ Պարզվել է, որ Volkswagen-ը շտապօգնության մեքենա է, այն պատկանում է QanCor բժշկական կենտրոնին։ Վարորդը հիվանդին տեղափոխում էր «Աստղիկ» բժշկական կենտրոնից դեպի QanCor բժշկական կենտրոն և միացրած է եղել ձայնային և լուսային ազդանշանները։
Սակայն Գազելը, որը սպասարկում է թիվ 45 երթուղին, չի զիջել շտապօգնության ավտոմեքենային, ինչն էլ դարձել է վթարի պատճառ։ Վթարի հետևանքով վիրավորներից մեկը բժիշկն է, մյուսը՝ բուժքույրը, ովքեր տեղափոխվել են «Սուրբ Գրիգոր Լուսավորիչ» բժշկական կենտրոն։
