Sputnik Արմենիայի նկարահանող խումբը եղել է Շամիրամում, խոսել տուժողների ու ականատեսների հետ ու արձանագրել` ենթադրյալ հանցագործի ձերբակալման լուրը ցրել է գյուղում առկա վախի ու տագնապի մթնոլորտը։
Շամիրամ գյուղի գերեզմանատանը կից սրահում առ այսօր առկա է արյան ծանր հոտը։ Տեղի ունեցած ողբերգության մասին են հուշում նաև արյան հետքերն ու պատերին առկա կրակոցների տեղերը։ Սրահի պատուհանները մշտապես բաց են, որպեսզի այստեղից հեռանա ոչ միայն ծանր օդը, այլև հանցանքի թողած ծանր տպավորությունը։
Սրահն արդեն 25 օր իր բուն նպատակին չի ծառայում։ Դեպքի վայրի զննություն իրականացնող քննիչներից բացի այստեղ ժամանակ առ ժամանակ գալիս են զոհերի հարազատները` հարգելու իրենց հարազատների հիշատակն ու ևս մեկ անգամ վերհիշելու ու վերաիմաստավորելու կատարվածը։
Շամիրամում տեղի ունեցած կրակոցների համար մեղադրվող ու 25 օր հետախուզման մեջ գտնվող Թելման Քալաշյանի ձերբակալության լուրը գյուղում շատ արագ է տարածվել։ Շուրջ 1 ամիս թևածող տագնապը վերացել է։ Գյուղից հեռացել են նաև դեպքից հետո 24 ժամ հերթապահություն իրականացնող ոստիկանները։
Հայրենի գյուղ են վերադարձել նաև կրակոցներից վիրավորված շամիրամցիները։
Խալեր Ազիզյանն անձամբ ճանաչել է ոչ միայն զոհերին, այլև ենթադրյալ հանցագործին։ Նա մինչ օրս չի կարողանում հավատալ կատարվածին։
Օգոստոսի լույս 25-ի գիշերը ոստիկանության և ԱԱԾ աշխատակիցները Արմավիրի մարզի Ջանֆիդա և Նալբանդյան գյուղերի միջնամասում հայտնաբերել ու բերման են ենթարկել 25 օր հետախուզման մեջ գտնվող Թելման Քալաշյանին:
