ԵՐԵՎԱՆ, 25 օգոստոսի — Sputnik. Ապօրինի զննությունների ու խուզարկությունների դեմ փաստաբանները բողոքի ակցիա կանեն։ Ակցիային այս պահի դրությամբ միացել է 138 փաստաբան:
Այս մասին Facebook-ի իր էջում հայտարարություն է տարածել փաստաբան Երվանդ Վարոսյանը՝ նշելով, որ հայտարարությունը բաց է և բոլոր գործընկերները կարող են դրան միանալ մինչ սեպտեմբերի 13-ը։
«Այս հայտարարությանը միացող փաստաբաններս, ի նշան փաստաբանի մասնագիտության և փաստաբանության անկախության և հեղինակության դեմ իրականացվող գործողություններին մեր անհամաձայնության, 2017թ. սեպտեմբերի 13-ին հայտարարում ենք բողոքի ակցիա (պայմանականորեն՝ գործադուլ), հրաժարվելով մասնակցել այդ օրը նշանակված դատական նիստերին»,- նշված է հայտարարության մեջ:
Փաստաբաններն այս քայլով նպատակ ունեն արտահայտել իրենց բողոքը Հայաստանում փաստաբանության հեղինակության և փաստաբանի մասնագիտության՝ իրավապաշտպանության նկատմամբ վերաբերմունքի այնպիսի անհանդուրժելի դրսևորումների դեմ, ինչպիսին է փաստաբանների և նրանց մասնագիտական ու անձնական տիրույթների և պատկանելիքի անձեռնմխելիության նկատմամբ ոտնձգությունները։
«Որևէ հիմնավորման բացակայության, ինչպես նաև դատարանների, փաստաբանի մասնագիտական պարտականություններն իրականացնելու հետ կապված այլ պետական կառույցների վարչական շենքերում արգելված իրերի ցանկի բացակայության պայմաններում, զննության թիրախ են դարձվել փաստաբանները։ Համապատասխան տեխնիկական հագեցվածության բացակայության պայմաններում, շատ դեպքերում զննությունը վեր է ածվում խուզարկության, ինչը անթույլատրելի է ու ստորացուցիչ։ Տպավորություն է ստեղծվում, որ փաստաբանների պարագայում գործում է օրինախախտի կանխավարկած»,- նշված է հայտարարության մեջ:
Այս հայտարարությանը միանալով և գործադուլի օր հայտարարելով` փաստաբանները, սակայն, իրենց վստահորդների (պաշտպանյալների և այլ շահառուների) իրավունքների և ազատությունների պաշտպանության նպատակով չեն դադարեցնելու նրանց ներկայացնելը՝ այդ օրը դատական նիստերի անհետաձգելիության դեպքում:
