ԵՐԵՎԱՆ, 24 օգոստոսի — Sputnik. Հայ հրշեջ փրկարարները գոնե մեկ օր անգործ չմնացին: Հայաստանում բռնկված աննախադեպ հրդեհների մարումից անմիջապես հետո խոշոր հրդեհ բռնկեց հարևան Վրաստանում՝ «Բորժոմի- Խարագաուլի» ազգային պարկի տարածքում:
Արդեն երեք օր է` մեր փրկարարները վրաց գործընկերների հետ փորձում են փրկել «Բորժոմի-Խարագաուլի» ազգային պարկը կրակի ճիրաններից: Հայ փրկարարները անմիջապես արձագանքեցին Վրաստանի իշխանությունների` Բորժոմիում բռնկած անտառային հրդեհի մարմանն աջակցելու խնդրանքին:
Այսօր արդեն փրկարար ծառայության անձնակազմը (8 հրշեջ-փրկարարական և 1 փրկարարական ավտոմեքենա, Աղետների բժշկության կենտրոնի 1 մեքենա և շարժական կառավարման կետ-շտաբ) տեղակայված է հրդեհի օջախներին մոտակա՝ Ծաղվերի բնակավայրի մոտ:
ԱԻՆ լրատվական բաժնի պետ Գոհար Բաղդասարյանի տեղեկացմամբ, օգոստոսի 24-ին, վաղ առավոտյան ՀՀ ԱԻՆ հրշեջ-փրկարարները վերսկսել են հրդեհաշիջման աշխատանքները Բորժոմիի անտառում: Հրդեհի վայր է ուղևորվել 4 մարտական հաշվարկ:
«Խոսրովի անտառում բռնկած հրդեհի հետ համեմատ պայմանները տարբեր են: Կա գրունտային տարբերություն: Այնտեղ աշխատելն ավելի հեշտ է, տևական ժամանակով բարձր ջերմաստիճան չի պահպանվել: Բացի այդ, այնտեղ կան հրդեհի վայրին մոտենալու ցամաքային ուղիներ, որոնք թույլ են տալիս հրշեջ մեքենաներին կրակը ավելի վաղ հանգցնել»,- ասաց նա։
«Բորժոմի-Խարագաուլի» ազգային պարկը կազմավորվել է 2002 թվականին՝ 79 հազար հեկտար տարածքի վրա, ներառելով Խարագաուլի բնակավայրը։
Տարածքում կան հյուրանոցներ ու 2 թանգարան։ Գործում է մոտ մեկ տասնյակ զբոսաշրջային ուղղություններ։ Բնապահպան, «ԷԿՈ ՄԵԴԻԱ» բնապահպանական ցանցի համահիմնադիր Գալուստ Նանյանի խոսքով` պարկի մասին պատմող ֆիլմը փաստում է, որ 20-րդ դարասկզբին այս տարածքում կազմավորված Բորժոմի առողջարանում և որսատեղիում է հանգստացել Ռուսաստանի վերջին ցար Նիկոլայ Ռոմանովը՝ իր ընտանիքով։ 1917 թվականի հեղափոխությունից հետո էլ այս տարածքը հետաքրքրել է ԽՍՀՄ առաջնորդներին, ուստի հիմնվել է ազգային պարկը։
Հայ փրկարարներ դեռ կշարունակեն աջակցել հրդեհաշիջման աշխատանքներին, ու կան բոլոր նախադրյալները, որ Բորժոմիի առողջարանային կենտրոնը կկրի հնարավորինս քիչ վնասներ, և, վրացական աղբյուրների հաղորդմամբ, կրակը քաղաքին չի հասնի:
