ԵՐԵՎԱՆ, 24 օգոստոսի–Sputnik. Հայաստանի Հանրապետության և Թուրքմենստանի միջև դիվանագիտական հարաբերությունների հաստատման 25-ամյակի նախօրեին տեղի ունեցավ երկու երկրների նախագահների բարձրագույն մակարդակի հանդիպում։
ՀՀ նախագահը բանակցությունների փուլում վերահաստատել է Հայաստանի դիրքորոշումը Լեռնային Ղարաբաղի հակամարտության խաղաղ կարգավորման տեսանկյունից։ Նախագահը հիշեցրեց, որ դա հիմնված է միջազգային իրավունքի նորմերի և սկզբունքների, ՄԱԿ-ի կանոնադրության դրույթների վրա։ Դրանք են` սպառնալիքի չկիրառումը, տարածքային ամբողջականությունը, իրավահավասարությունն ու ժողովուրդների ինքնորոշման իրավունքը։
«Ընդգծվել է հակամարտության գոտում իրավիճակի սրացման կանխարգելմանը, իրավիճակի կայունացմանը և միջազգային հանրության միջնորդական մանդատով օժտված միակ ձևաչափի՝ ԵԱՀԿ Մինսկի խմբի համանախագահ երկրների ջանքերի շրջանակներում խաղաղ գործընթացի առաջմղման համար պայմանների ստեղծմանն ուղղված պայմանավորվածությունների իրականացման կարևորությունը»,–ասաց Սերժ Սարգսյանը։
Երկու երկրների գործակցության շրջանակը մեծ է տնտեսական ոլորտում։
«Պարոն նախագահի հետ մենք հատուկ ուշադրություն հատկացրեցինք առևտրատնտեսական համագործակցության զարգացման հեռանկարային ուղղություններին: Ցավոք, գլոբալ շուկաներում անբարենպաստ իրադրությունն անդրադարձել է նաև մեր առևտրաշրջանառության վրա: Այս համատեքստում մենք քննարկեցինք երկկողմ տնտեսական համագործակցության խթանման, փոխգործակցության նոր հորիզոններ դուրս գալու հնարավոր ուղիները և առկա միջոցները»,–ասաց երկրի ղեկավարը։
Երկու երկրների նախագահները քննարկել են նաև մայրաքաղաքների միջև ուղիղ ավիաչվերթի հնարավոր մեկնարկի հարցը: Սարգսյանի խոսքով` Հայաստանը պատրաստ է տրամադրել թուրքմեն բարեկամներին իրականացվող «բաց երկնքի» քաղաքականության շրջանակում նախատեսված արտոնությունների ամբողջական փաթեթ:
«Իհարկե, մենք անդրադարձել ենք նաև համագործակցության ավանդական ուղղություններին, այդ թվում՝ էներգետիկայի ոլորտում: Պայմանավորվել ենք հետագայում ևս զարգացնել արդյունավետ փոխգործակցություն այս ոլորտում: Որոշակի հեռանկարներ են բացահայտվում նաև գյուղատնտեսության ոլորտում: Հուսով ենք, որ թուրքմեն գործընկերները կմասնակցեն Հայաստանում ստեղծվող ազատ տնտեսական գոտու գործունեությանը»,–ասաց Սերժ Սարգսյանը։
Իր ելույթի վերջում ՀՀ նախագահը համոզմունք հայտնեց, որ ձեռքբերված պայմանավորվածությունները կնպաստեն Հայաստանի և Թուրքմենստանի միջև իրապես բարեկամական հարաբերությունների ամբողջ համալիրի հետագա զարգացմանը:
