ԵՐԵՎԱՆ, 23 օգոստոսի — Sputnik. Վրաստանի նախագահ Գեորգի Մարգվելաշվիլին այսօր` օգոստոսի 23-ին, շնորհակալություն է հայտնել Հայաստանից, Թուրքիայից, Ադրբեջանից և Բելառուսից ժամանած հրշեջ–փրկարարներին, որոնք մասնակցում են Բորժոմիի անտառների հրդեհաշիջման աշխատանքներին։ Այս մասին հայտնում է Sputnik Գրուզիան։
Վրաստանի նախագահը չորեքշաբթի առավոտյան ժամանել է դեպքի վայր իրավիճակին անձամբ ծանոթանալու համար։ Օգոստոսի 20-ից ընթացող հրդեհաշիջման աշխատանքներին մասնակցում է վեց ուղղաթիռ և հատուկ ինքնաթիռ։ Հայաստանը հարևան երկիր էր ուղարկել իր հրշեջ–փրկարարներին։
«Մենք տեսանք, որ Վրաստանն անկեղծ բարեկամներ ունի։ Մարդիկ աշխատում են 24-ժամյա ռեժիմով, առանց ջանք խնայելու։ Կրկին անգամ շնորհակալություն եմ հայտնում նրանց», – ասել է Մարգվելաշվիլին։ Նախագահը շնորհակալություն է հայտնել բոլոր երկրներին ցուցաբերած օգնության համար և նշել, որ նման փոխօգնությունը չափազանց կարևոր է։
Բորժոմիի անտառներում հրդեհ էր բռնկվել օգոստոսի 20-ին։ Չորեքշաբթի գիշերը հրդեհ էր բռնկել նաև Զեմո Բոշուրի գյուղի անտառների մերձակայքում, բարեբախտաբար, հրդեհը հաջողվել էր մարել։
