ԵՐԵՎԱՆ, 23 օգոստոսի — Sputnik. Ինստագրամում մեծ ճանաչում վայելող խոհարար Նուսրեթ Գյոքչեն մի տեսանյութ է հրապարակել, որում նա պարում է Super Sako-ի երգի տակ։ Տեսանյութը զայրացրել է ադրբեջանցիներին։
Գյոքչեն Ինստագրամի իր էջում սովորաբար հրապարակում է տեսանյութեր, որոնցում նա հմտորեն կտրատում է մսի խոշոր կտորները կամ ուտեստներ է պատրաստում մսից։ Այժմ նա Թուրքիայում ռեստորանների ցանց ունի, որի շրջանառաությունը հասնում է մեկ միլիոն դոլարի։
Թուրքական որոշ լրատվամիջոցներ հայտնում են, որ Գյոքչեն պայմանագիր է կնքել ամերիկյան PR գործակալության հետ, որպեսզի ճանաչում ստանա ամբողջ աշխարհում։
Ըստ տեղեկությունների` նա զգալի գումար է վճարել, որպեսզի հոլիվուդյան դերասան Լեոնարդո Դի Կապրիոն այցելի Նուսրեթի` Դուբայում գտնվող ռեստորանը, իսկ ինքը` խոհարարը, էպիզոդիկ դեր ունենա ամերիկյան «Նարկո» սերիալում։
