Թուրքմենստանի նախագահի այցը կարող է կապված լինել գազային բանակցությունների հետ, Sputnik Արմենիայի հետ զրույցում նման կարծիք է հայտնել քաղաքագետ Ստեփան Դանիելյանը։
«Թուրքմենստանն աշխարհում ընկալվում է որպես գազի շատ խոշոր պաշարներ ունեցող երկիր, որը նաև գազամուղով կապված է Իրանի հետ, այնպես, ինչպես և Հայաստանը»,– ասում է քաղաքագետը` չբացառելով, որ հանդիպման օրակարգում կարող են շոշափվել նաև Իրանի հետ Հայաստանի բանակցությունները գազի ներմուծման ծավալները մեծացնելու շուրջ։
Նախագահ Սերժ Սարգսյանի հրավերով օգոստոսի 23-ի երեկոյան պաշտոնական այցով Հայաստան կժամանի Թուրքմենստանի նախագահ Գուրբանգուլի Բերդիմուհամեդովը:
Այցի շրջանակում նախատեսված են Թուրքմենստանի նախագահի հանդիպումները ՀՀ բարձրագույն ղեկավարության հետ: Նախագահի նստավայրում հայ-թուրքմենական բարձր մակարդակի բանակցությունների ավարտին նախատեսվում է փաստաթղթերի ստորագրման արարողություն:
Նախագահներ Սերժ Սարգսյանը և Գուրբանգուլի Բերդիմուհամեդովը լրատվամիջոցների առջև հանդես կգան բանակցությունների արդյունքներն ամփոփող հայտարարություններով:
