ԵՐԵՎԱՆ, 23 օգոստոսի – Sputnik, Նելլի Դանիելյան. Հայ քաղաքագետները Սարգսյան–Ալիև հերթական հանդիպումից մեծ ակնկալիք չունեն։
«Սովորական, ոչ պաշտոնական, աշխատանքային հանդիպում է, որը Սոչիում պարբերաբար անցկացվում է տարբեր երկրների առաջնորդների միջև, և որից որևէ բան ակնկալել պետք չէ»,– Sputnik Արմենիայի հետ զրույցում ասաց քաղաքագետ Սերգեյ Շաքարյանցը` հավելելով. «Ոչ մի բան չի հայտարարվի և ոչ էլ որևէ պաշտոնական հայտարարություն կլինի, ուղղակի հաղորդագրություն կտարածվի, որ հանդիպել են այս ու այս հարցերն են քննարկել»։
Նույն կարծիքը հայտնեց նաև քաղաքագետ Ստեփան Դանիելյանը։ Նա նաև նկատեց, որ ի տարբերություն երկու նախագահների նախորդ հանդիպումների, այս անգամ դրան ընդառաջ սահմանի վրա մեծ լարվածություն չի նկատվում։ Սա, նրա դիտարկմամբ, կարող է երկու բացատրություն ունենալ` կա՛մ հանդիպման օրակարգում Արցախի հարցը գլոբալ ձևով դրված չէ, կա՛մ լարվածությունը մեղմել են փոխզիջումների մասին քննարկումները։
Այս տեսանկյունից Ստեփան Դանիելյանը պատահական չի համարում ՌԴ Կոմունիստական կուսակցության Կենտրոնական կոմիտեի նախագահ Գենադի Զյուգանովի հայտարարությունը` ԼՂ խնդրի կարգավորման մասին, որտեղ նա իր տեսլականն էր ներկայացրել հնարավոր փոխզիջումների ու ԼՂ–ում ռուսական զինուժի տեղակայման մասին։
«Եթե նույնիսկ Ռուսաստանի ցանկությունը սա է, ինձ չի թվում, որ Ադրբեջանը կհամաձայնի իր սուվերենության կարգավիճակը մի քանի աստիճանով իջեցնել ինչ–որ տարածքների համար»,– ասում է Դանիելյանը։
Սերգեյ Շաքարյանցը` հակառակը, ռուս քաղաքական գործչի հայտարարություններին լուրջ չի վերաբերում։ «Զյուգանովի հայտարարություններն արդեն վաղուց ոչ ոք հաշվի չի առնում։ Նա ո՛չ Պուտինի ապարատի աշխատակից է, ո՛չ իշխող կուսակցության անդամ, ուղղակի պատգամավոր է։ Զյուգանովը ոչ ոք է այն քաղաքական աշխարհում, որտեղ որոշումներ են կայացվում, հարցեր են լուծվում»,– ասում է Շաքարյանցը։
Ինչ վերաբերում է ԵԱՏՄ–ին անդամակցելու մասին Թուրքիայի հայտնած մտադրությանը, ապա այն քաղաքագետ Ստեփան Դանիելյանի կարծիքով, կարող է իր ազդեցությունն ունենալ Սարգսյան–Ալիև հանդիպման ենթատեքստում։
Սերգեյ Շաքարյանցն այս տեսակետը չի կիսում։ Նրա համոզմամբ, Թուրքիան նման կարգի հայտարարություններով ուղղակի տրամադրությունների ստուգում է իրականացնում, ինչը պարզապես դիվանագիտական աշխատանքի մի մաս է։ Այդ հայտարարությունն, ըստ Շաքարյանցի, որևէ լուրջ հիմք չունի։
