ԵՐԵՎԱՆ, 23 օգոստոսի – Sputnik. Հայաստանի ու Ռուսաստանի հարաբերությունները վերջին տարիների ընթացքում լրջորեն ամրապնդվել են, ասաց ՌԴ նախագահ Վլադիմիր Պուտինը Սոչիում իր հայ գործընկերոջ հետ հանդիպման ժամանակ, հայտնում է ՌԻԱ Նովոստին։
«Մեզ մոտ ինտենսիվորեն պահպանվում է քաղաքական երկխոսությունը, երկկողմանի համագործակցություն կա տնտեսության, անվտանգության, ռազմական ոլորտներում, մենք նաև ակտիվորեն համագործակցում ենք միջազգային կազմակերպությունների ու ինտեգրացիոն միավորումների շրջանակում», – ասել է Պուտինը։
Պուտինի խոսքով` դիվանագիտական հարաբերությունների հաստատումից հետո, անցած 25 տարվա ընթացքում, ռազմավարական համագործակցության մասին առանցքային պայմանագրի ստորագրումից 20 տարի անց, երկրների միջև հարաբերությունները լրջորեն ամրապնդվել են։
Նա նշել է, որ Սարգսյանի հետ հանդիպման ժամանակ նախատեսվում է բազմաթիվ թեմաների քննարկում։
ՀՀ նախագահ Սերժ Սարգսյանն էլ իր հերթին նշել է, որ վերջին տարիների ընթացքում հարաբերությունները երկրների միջև ավելի ինտենսիվ էին զարգանում։
«Ռազմավարական դաշնակցային հարաբերություններն առանձնանում են ինտենսիվ բարձր մակարդակի վրա դրված երկխոսությամբ, լայն արտաքին քաղաքական և միջազգային ու տարածաշրջանային հարթակներում կառուցողական համագործակցությամբ, անվտանգության, ռազմական ու ռազմատեխնիկական ոլորտներում արդյունավետ գործակցությամբ», – ասել է ՀՀ նախագահը։
Նա նշել է, որ երկու երկրների միջև մեծանում է ապրանքաշրջանառությունը։ Այս տարվա առաջին վեց ամիսների ընթացքում ապրանքաշրջանառության աճը կազմել է 23 %։
Սարգսյանն ուշադրություն է հրավիրել այն փաստի վրա, որ առաջիկա օրերի ընթացքում կկայանա ռազմատեխնիկական համագործակցության հանձնաժողովի, առևտրա–տնտեսական համագործակցության ու խորհրդարանական համագործակցության հանձնաժողովների նիստերը։
Սերժ Սարգսյանը շնորհակալություն է հայտնել Վլադիմիր Պուտինին Հայաստանի անտառային հրդեհների հրդեհաշիջման աշխատանքներում օգնություն ցուցաբերելու համար։
