ԵՐԵՎԱՆ, 23 օգոստոսի – Sputnik. Վայոց Ձորի մարզի Սարավանի անտառտնտեսությունում տեղի ունեցած հրդեհի փաստով հարուցվել է քրեական գործ։ Հայտնում է ՀՀ քննչական կոմիտեն։ Մեղադրանք է առաջադրվել մեկ անձի:
Քրեական գործի շրջանակներում իրականացված քննչական գործողությունների արդյունքում պարզվել է, որ հրդեհը բռնկվել է անսարք ավտոմեքենայի շահագործման ժամանակ խլացուցչից արտանետված բոցերի հետևանքով։
Քննիչները պարզել են, որ Արտավան համայնքի բնակիչը շուրջ մեկ ամիս անսարք վիճակում գտնվող, շահագործման ոչ ենթակա «ՎԱԶ 21011» մակնիշի առանց համարանիշի ավտոմեքենայով պարբերաբար գնացել է նույն համայնքի խոտհարքի տարածք։ Վերելք բարձրանալու համար արագություն հավաքելու նպատակով վարորդն ինտենսիվորեն սեղմել է գազի ոտնակը, ինչի հետևանքով ավտոմեքենայի անսարք խլացուցչից արտանետվել են բոցեր, և հրդեհ է բռնկվել:
Սարավանի բնակչին մեղադրանք է առաջադրվել անտառն անզգուշությամբ ոչնչացնելու և առանձնապես խոշոր չափերի վնաս պատճառելու համար, նրա նկատմամբ որպես խափանման միջոց է ընտրվել ստորագրություն չհեռանալու մասին: Նախաքննությունը շարունակվում է։
Հիշեցնենք, օգոստոսի 10-ին Վայոց ձորի մարզի Արտավան գյուղի խոտածածկ տարածքներում հրդեհ էր բռնկվել, որը հետագա օրերին տարածվել էր՝ ներառելով Սարավանի անտառպետությանը պատկանող տարածքները։
Հրդեհի արդյունքում ոչնչացվել էր 300 հա անտառապատ տարածք:
