ԵՐԵՎԱՆ, 22 օգոստոսի — Sputnik. Թուրքիայի իշխանությունը Եվրասիական տնտեսական հանձնաժողով չի դիմել ԵԱՏՄ-ին անդամակցելու համար։ Այս մասին Sputnik Արմենիային հայտնեցին հանձնաժողովի մամուլի ծառայությունից։
«Եվրասիական տնտեսական հանձնաժողովը թուրքական կողմից պաշտոնական դիմում չի ստացել»,- հայտնեցին ԵԱՏՀ-ից։
Հանձնաժողովի ներկայացուցիչն ընդգծեց նաև, որ ԵԱՏՄ-ն պատրաստ է փոխշահավետ տնտեսական համագործակցություն հաստատել երրորդ երկրների հետ և կարող է գործակցության տարբեր ձևաչափեր առաջարկել։
«Սակայն այդ բոլոր հնարավորությունները կքննարկվեն միայն այն ժամանակ, երբ Թուրքիայի Հանրապետության կառավարության ներկայացուցիչները դիմեն ԵԱՏՀ»,- նշեցին հանձնաժողովից։
Թուրքիայի էկոնոմիկայի նախարար Նիհաթ Զեյբեկչին օգոստոսի 18-ին հայտարարել է ԵԱՏՄ-ի հետ մաքսային համաձայնագրի ստորագրման ու ազատ առևտրի գոտի ստեղծելու մտադրության մասին։ Զեյբեկչին հայտնել է, որ Անկարայում հույս ունեն համապատասխան բանակցություններն ավարտել արդեն այս տարի։
«Առաջարկ կա, որ Թուրքիան սկսի բանակցել ԵԱՏՄ-ի հետ մաքսային համաձայնագրի ստորագրման շուրջ`չխախտելով Թուրքիայի հետ համապատասխան համաձայնագիրը, Թուրքիան մտադիր է նաև այլ համագործակցություն հաստատել ԵԱՏՄ-ի հետ։ Համագործակցության մի շարք ուղղություններ կան` նավթաքիմիա, գյուղատնտեսություն և այլն, որոնք նոր ներուժ կբացահայտեն։ ՌԴ-ի և Թուրքիայի միջև ազատ առևտրի մասին համաձայնագիրը համագործակցության նոր մակարդակ և ներդրումներ կբերի», — ասել է Զեյբեկչին։
Հայաստանը ԵԱՏՄ լիիրավ անդամ է դարձել 2015 թվականի հունվարի 2-ին։ Կազմակերպությանն անդամակցում են նաև Ռուսաստանը, Բելառուսը, Ղազախստանն ու Ղրղըզստանը։
