ԵՐԵՎԱՆ, 22 օգոստոսի — Sputnik. «Սասնա ծռերի» փաստաբանները որոշել են գործադուլ անել։ Նրանք այսպես են իրենց բողոքն արտահայտում դատարաններում իրենց նկատմամբ իրականացվող խուզարկության դեմ։ Այս մասին Sputnik Արմենիային հայտնեց խմբի անդամ Արայիկ Խանդոյանի փաստաբան Արայիկ Պապիկյանը` հավելելով, որ գործադուլի սկիզբը նախանշված է սեպտեմբերի 13-ին։
Օրվա ընտրությունը պատահական է և որևէ իրադարձության հետ կապ չունի, պարզապես դժգոհություն ունեցող փաստաբանները որոշել են չխանգարել Փաստաբանների պալատում նախանշված ընտրությանը և գործադուլն անել դրանից հետո։
«Առաջին հերթին գործադուլը կարտահայտվի դատական նիստերին չներկայանալով, թեև, եթե մեր պաշտպանյալներից որևէ մեկին անհրաժեշտ կլինի իր պաշտպանի ներկայությունը, տվյալ փաստաբանը, բնականաբար, կներկայանա դատական նիստին»,- ասաց Պապիկյանը։
Գործադուլ անցկացնելու որոշմանն այս պահին միացել է շուրջ 50 փաստաբան։ Կազմակերպիչները չեն բացառում, որ նրանց թիվը մինչև սեպտեմբեր կավելանա։
Հիշեցնենք, որ «Սասնա ծռերի» գործով դատավարությունների առաջին օրերից խմբի անդամների փաստաբանները բարձրաձայնեցին դատարան մուտք գործելու համար Դատական կարգադրիչների կողմից իրենց խուզարկելու խնդրի մասին` այն ապօրինի որակելով։
Դատական դեպարտամենտը հանդես եկավ պարզաբանմամբ` նշելով, որ դա իրականացվում է օրենքով սահմանված կարգով։
