Խորովածի 9-րդ փառատոնը, որը կայացավ «խորովածի մայրաքաղաք» հռչակված Ախթալայում, լի էր անակնկալներով։ Այն Լոռու մարզի Ախթալա քաղաքում մեկտեղել էր ինչպես տեղացի, այնպես էլ օտարերկրացի խորովածասերներին:
Երևանի և մարզերի շուրջ 40 ռեստորանների ներկայացուցիչներն իրենց վարպետությունը ցուցադրելու համար ժամանել էին Ախթալա:
«Խորովածի փառատոնին» մրցանակները շնորհվեցին 3 անվանակարգում` «Լավագույն ձևավորում», «Լավագույն համ» և «Լավագույն գաղափար»։
Միաժամանակ երեք անվանակարգի հաղթող ճանաչվեց Երևանի «Լուսաբաց» ռեստորանը։ Sputnik Արմենիայի թղթակցի հետ զրույցում ռեստորանի շեֆ–խոհարարը նշեց, որ «Լուսաբացն» առաջին անգամ չէ, որ Ախթալայում կազմակերպվող Խորովածի փառատոնի հաղթող է դառնում։
