ԵՐԵՎԱՆ, 20 օգոստոսի — Sputnik, Արմենուհի Մխոյան. 19-րդ դարում ռուս-թուրքական պատերազմներում զոհված զինվորականների հիշատակին նվիրված միջոցառումները Գյումրիում վերջին տարիներին ավանդույթ են դառնում: Օգոստոսի 20-ին ևս 1828, 1855 և 1877-1878 թվականներին զոհված 240 զինվորականների հիշատակին նվիրված միջոցառում տեղի ունեցավ: Ի հիշատակ նրանց, ում աճյուններն ամփոփված են այս վայրում, ծաղիկներ ու ծաղկեպսակ դրվեցին, հնչեցին երկու երկրների օրհներգերը, կատարվեց հիշատակի կարգ՝ ձեռամբ ռուս ուղղափառ եկեղեցու հոգևոր հովիվ հայր Անդրեյի: Իսկ մինչ այդ 1 րոպե լռությամբ ներկաները հարգեցին նրանց հիշատակը:
Արարողությանը ներկա էին մարզային ու քաղաքային իշխանությունների ներկայացուցիչները, ՌԴ հյուպատոս Ալեքսանդր Կոպնինը, պաշտոնատար այլ անձինք, 102-րդ ռազմաբազայի և սահմանապահ ջոկատի զինվորներ և սպաներ: Ելույթի ժամանակ Շիրակի փախմարզպետ Սեյրան Պետրոսյանը կարևորեց հայ և ռուս ժողովուրդների դարավոր բարեկամությունը, նշելով՝ որ «Պատվո բլուր» հուշահամալիրի բացումն իրապես պատմական իրադարձություն կարելի է համարել:
«Յոթ տարի առաջ` օգոստոսի 20-ին, վերաբացվեց այս հուշահամալիրը, որի բացման հանդիսավոր արարողությանը մասնակցեցին ՌԴ և ՀՀ նախագահները: Այս իրադարձությունն առավել սերտացրեց հայ-ռուսական բազմադարյա բարեկամությունը: Հուշահամալիրի վերաբացումը ևս մեկ ապացույց էր, որ մեր երկու ժողովուրդները փառքով են հիշում և խնկարկում իրենց այն որդիներին, որոնք զոհվել են հանուն ազատության: Այսօր էլ, յոթ տարի անց, մենք այստեղ ենք, որպեսզի վառ պահենք նրանց հիշատակը»,-նշեց փոխմարզպետ Սեյրան Պետրոսյան:
Երկու երկրների միջև դարավոր բարեկամության մասին խոսեց նաև Գյումրու քաղաքապետ Սամվել Բալասանյանը: Նրա խոսքով` 2010 թվականին վերականգնված այս հուշակոթողն արդեն դարձել է ոչ միայն հիշատակի, այլ երկու երկրների բարեկամությունը խորհրդանշող հրաշալի կոթող։
Իսկ ՌԴ նորանշանակ հյուպատոս Ալեքսանդր Կոպնինը ռուս ժողովրդի անունից շնորհակալություն հայտնեց հայ ազգին՝ հոգատար վերաբերմունքի և պատմական հիշողությունները կարևորելու համար: «Շնորհակալություն եմ ուզում հայտնել հայ ազգին մեր պատմության նկատմամբ նմանատիպ հոգատար վերաբերմունքի և մեր զինվորների հիշատակը հարգելու, ինչպես նաև Կովկասում պատմական իրադարձությունների ճիշտ ներկայացման համար: Հայ և ռուս ազգերի դարավոր բարեկամական կապը լի է անձնվեր դրվագներով՝ հանուն ընդհանուր նպատակի ու հաղթանակի»,-իր խոսքում նշեց ՌԴ հյուպատոս Ալեքսանդր Կոպնինը:
2009թ. Շիրակի և ՌԴ Ուլյանովսկի մարզերի իշխանությունների նախաձեռնությամբ ու հայ-ռուսական բարեգործական «Պատվի գործ» կազմակերպության համատեղ ջանքերով այս տարածքում իրականացվել են բարեկարգման և վերակառուցման աշխատանքներ, կառուցվել է ռուս սպաների հիշատակը հավերժացնող հուշարձան։
