ԵՐԵՎԱՆ, 20 օգոստոսի — Sputnik. Այսօր, ժամը 16:30-ի սահմաններում, Toyota Sequoia մակնիշի, 011 AS 001 համարանիշի ավտոմեքենան Երևան-Սևան ավտոճանապարհի 15 կմ հատվածում վթարի է ենթարկվել:
Երևան քաղաքի Վարդաշեն 11 փողոցի բնակիչ 42-ամյա Կարապետ Օհանյանը, դեպի Երևան ընթանալիս, դուրս է եկել ճանապարհի երթևեկելի գոտուց, բախվել բետոնե արգելապատնեշներին, այնուհետև առաջ ընթանալով բախվել է կամրջի երկաթե ճաղավանդակներին և մասամբ կախվել մոտ 65 մետր բարձրություն ունեցող կամրջի եզրին:
Այս մասին տեղեկացնում է shamshyan.com կայքը։
Վթարի հետևանքով ավտոմեքենայի ուղևորը՝ 12-ամյա Ռոբերտ Օհանյանը, տեղափոխվել է հիվանդանոց:
Աղբյուրի տեղեկություններով՝ նշված ավտոմեքենան սպասարկում է Վրաստանում Հայաստանի արտակարգ և լիազոր դեսպան Յուրի Վարդանյանին, ով այդ պահին ավտոմեքենայում չի եղել: Հիվանդանոց տեղափոխված 12-ամյա երեխան վարորդի որդին է:
