ԵՐԵՎԱՆ, 19 օգոստոսի — Sputnik, Արմենուհի Մխոյան. ՀՀ կառավարությունը Գյումրու թիվ 3 ավագ դպրոցը լուծարելու մասին որոշմանը հավանության էր տվել օգոստոսի 17-ին։
Հիմնավորման համաձայն՝ որոշման ընդունումը պայմանավորված է Գյումրու թիվ 3 ավագ դպրոցի աշակերտների թվի կրճատմամբ: 2016-2017 ուսումնական տարում դպրոցում սովորել է 141 աշակերտ, աշխատել է 39 մարդ, որից 21-ը՝ ուսուցիչ, 4-ը՝ վարչական, 14-ը՝ տնտեսական աշխատող:
Չնայած այն փաստին, որ դեռ ուսումնական տարեվերջին արդեն իսկ հստակ էր՝ Շիրակում որոշ ավագ դպրոցների լուծարման կամ միավորման գործընթացն անխուսափելի է, այս դպրոցի մասին չէր խոսվում, համենայն դեպս` բարձրաձայն։ Բայց փաստը մնում է փաստ, որ լավագույն շենքային պայմաններ ու նյութատեխնիկական բազա ունեցող դպրոցն ունի աշակերտական թվի լուրջ խնդիր: Սա այն պարագայում, որ դպրոցն ուներ բավական փորձաշատ մանկավարժական հանրույթ, իսկ աշակերտներն էլ միշտ աչքի են ընկել հանրապետական տարբեր օլիմպիադաներում ու մրցույթներում:
Խոսելով դպրոցի լուծարման անհրաժեշտության մասին՝ դպրոցի տնօրեն Կարեն Դարբինյանը առանձնացրեց ամենակարևորը՝ աշակերտների թվաքանակն ու դրանից բխող ֆինանսական խնդիրները:
«2016—2017 ուսումնական տարում դպրոցում սովորել է 141 աշակերտ, իսկ եթե հաշվի առնենք շրջանավարտների թիվը, ապա այս պահի դրությամբ դպրոցն ունի 85 աշակերտ: Խնդիրը միայն թվաքանակի հետ է կապված: Կարծում եմ` մինչև նոր ուսումնական տարվա սկիզբ միայն մեր դպրոցը չի լինի նման գործընթացի մեջ, առաջիկա օրերին ականատես կլինեք նաև Գյումրու այլ դպրոցների միավորմանը, վերամիավորմանը կամ լուծարմանը»,-Sputnik Արմենիային վստահեցրեց Կարեն Դարբինյանը։
Նրա խոսքով` դպրոցը դե ֆակտո լուծարված չէ, պարզապես իրավաբանական տեսանկյունից ՊՈԱԿ-ը չէր կարող միանալ հիմնադրամին, և «լուծարվել» տերմինն այդ պատճառով է օգտագործվում, իսկ փաստացի այն միանում է «Շիրակի Մ. Նալբանդյանի անվան պետական համալսարան»-ին:
Այս քայլն, ըստ տնօրենի, թերևս եթե ոչ «լավագույն», ապա «տարբերակ» կարող է համարվել շատերի համար:
Նշենք, որ համալսարանի ռեկտորը, որը նախկինում ղեկավարել է մարզի կրթության վարչությունը և լավ տիրապետում է կրթական հաստատությունների ներուժին, խոստացել է, որ մանկավարժական հանրույթի կրճատումներ չեն լինի, ավելին` ավագ դպրոցի նախկին տնօրենը կղեկավարի միացյալ՝ թիվ 3 և համալսարանի ավագ դպրոցները:
«Կարծում եմ` բուհի համար կարևոր է փորձառություն անցած, լավագույն մանկավարժական կադրեր ունեցող դպրոցի հետ միավորվելը: Սա նաև լավ հենարան է դպրոցի համար՝ լավագույն ավանդույթներ ունեցող բուհի հիմնադրամին միանալու: Հաշվի են առնվել նաև շենքային պայմանները»,- Sputnik Արմենիային վստահեցրեց Դարբինյանը՝ հավելելով «համալսարանը լավագույնին ձգտելով, միավորվեց լավագույնին»:
1937 թվականին կառուցված դպրոցը նախկինում կրել է Հովհաննես Թումանյանի անունը; Ուսումնական այս հաստատությունը մարզում առաջինն էր, որը վերակազմավորվեց ավագ դպրոցի: Այս պահին դպրոցի կարգավիճակի փոփոխությունը դեռ ծնողներին չի անհանգստացնում, տնօրենը վստահեցնում է ՝ բողոքներ չեն ստացվել:
Այն, որ մարզում բացի այս դպրոցից կլինեն նաև այլ դպրոցների վերակազմավորումներ կամ վերամիավորումներ, վստահ են բոլորը, բայց քանի դեռ չկա կառավարության որոշում, ոլորտի պատասխանատուները զգուշավորությամբ են խոսում այդ մասին:
