Կարապի լճում երեկոյան անցկացվեց Երևանի գարեջրի 4-րդ փառատոնը։ Գարեջուր ըմպելու մրցույթներ, համտեսներ, շոու համարներ և պարզապես ուրախ տրամադրություն. այսպիսին էր այսօր մայրաքաղաքի կենտրոնի մթնոլորտը։
Հայաստանում պատրաստվող գարեջրի մասին առաջին հիշատակությունը հանդիպում է հույն պատմիչ և զորավար Քսենոֆոնի «Անաբասիս» աշխատության մեջ։
Մթա 5-րդ դարում Հայաստանով անցած Քսենոֆոնը նկարագրում է մի ըմպելիք, որը պահվում էր տակառներով ու որի երեսին գարու հատիկներ էին լողում։
1952 թվականին Հայաստանում հիմնադրվեց Երևանի Գարեջրի գործարանը: Այսօր մեր երկրում գարեջուր արտադրող 7 գործարան կա, որտեղ արտադրվում են գարեջրի տարբեր տեսակներ` բաց, մուգ, զտված և չզտված։
Թերևս նաև այս արտադրանքի բազմազանությունն է առիթ հանդիսացել, որ Երևանի քաղաքապետարանը գարեջրի ամենամյա փառատոն նախաձեռնի ու մեր հնագույն խմիչքներից մեկը ներկայացնի նաև Հայաստան այցելած զբոսաշրջիկներին։
