ԵՐԵՎԱՆ, 18 օգոստոսի — Sputnik. ՌԴ-ում 6 տարի 9 ամսվա ազատազրկման դատապարտված վարորդ Հրաչյա Հարությունյանն այսօր դարձյալ ամբաստանյալի աթոռին էր։ Այս անգամ արդեն` հայաստանյան դատարանում։ Ռուսաստանից Հայաստան տեղափոխվելուց հետո անհրաժեշտություն է առաջացել ճանաչել Հրաչյա Հարությունյանի նկատմամբ ՌԴ-ում կայացված դատավճիռն ու այն համապատասխանեցնել հայաստանյան օրենսդրությանը։
Հիշեցնենք, որ ՌԴ դատարանը Հրաչյա Հարությունյանին մեղավոր էր ճանաչել ՌԴ քրեական օրենսգրքի 264.5 և 321.3 հոդվածներով։ Հայաստանում նույն արարքը համապատասխանում է ՀՀ քրեական օրենսգրքի 242 հոդվածի 3-րդ կետին, այն է՝ Ճանապարհային երթևեկության և տրանսպորտային միջոցների շահագործման կանոնները խախտելը, որն առաջացրել է 2 և ավելի անձանց մահ։
Դատական նիստի մեկնարկին Հրաչյա Հարությունյանը հրաժարվեց պաշտպան ունենալուց՝ հայտարարելով, որ ինքնուրույն կպաշտպանվի։ Մինչ այդ նա պատասխանեց նաև լրագրողների հարցերին՝ հայտնելով, որ ուրախ է Հայաստան տեղափոխվելու համար և վստահում է հայաստանյան դատական համակարգին։
Դատական նիստին ներկա հարազատները Sputnik Արմենիայի հետ զրույցում ասացին, որ Հրաչյա Հարությունյանն առողջական լուրջ խնդիրներ ունի (շաքարախտ, ողնաշարի 3 ճողվածք, անութի շրջանում անհայտ գոյացություն), ուստի հույս էին փայփայում, որ նրան դատարանն ազատ կարձակի դատարանի դահլիճից։
Դատական նիստին ներկա ՔԿՎ իրավաբանական բաժնի պետի տեղակալ Տիգրան Սահակյանը պարզաբանեց, որ այսօր դատարանը պետք է քննարկի և որոշում կայացնի բացառապես ՌԴ-ում կայացված վճիռը ՀՀ օրենսդրությանը համապատասխանեցնելու մասին։
Պատժի հետագա կրման հետ կապված հարցերը, այդ թվում՝ պատժի հետագա կրման տեղն ու ձևը, 20-օրյա ժամկետում կքննի ու որոշում կկայացնի համապատասխան հանձնաժողովը։
Միջնորդությունը քննարկելուց հետո դատարանը վճռեց ճանաչել ՌԴ դատարանի կայացրած վճիռն ու այն թողնել ուժի մեջ՝ պատժի կրման սկիզբը հաշվելով 2013թ-ի հուլիսից։
Այսպիսով, Հրաչյա Հարությունյանի պատժի ավարտին մնում է 2 տարի 9 ամիս։ Իսկ թե ինչ պայմաններում կկրի պատիժը, պարզ կլինի 20 օրից, երբ հանձնաժողովը կայացնի իր որոշումը։
