ԵՐԵՎԱՆ, 18 օգոստոսի – Sputnik. Հայաստանի ճանապարհների իրավիճակը բարելավել է` էապես կրճատելով մահվան ելքով միջադեպերի քանակը։ Օգնեց արագաչափերի ու տեսախցիկների տեղադրումը, այսօր Sputnik Արմենիա մամուլի կենտրոնում ասաց ՀՀ ՃՈ Տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանը` ներկայացնելով վիճակագրական տվյալներ։
Հայաստանի ոստիկանության տվյալների համաձայն` 2016 թվականին ՃՏՊ–երի ու ճանապարհներին մահերի քանակը 2015 թվականի համեմատ կտրուկ նվազել է։ 196–ով նվազել է ՃՏՊ–երի քանակը, իսկ ամենակարևորը` զոհերը 76–ով քիչ են։
2017 թվականի առաջին 7 ամիսների ընթացքում տեղի է ունեցել 1998 ՃՏՊ, 145 մարդ մահացել է, 2956–ը վնասվածք ստացել։ 2016 թվականին պատահարների քանակն ավելի քիչ էր` 1870, որոնցից մահացել է 145 մարդ, 2636` վիրավորում ստացել։
Տվյալ պահին ամբողջ Հայաստանում 175 արագաչափ է տեղադրված, դրանցից 81–ը` Երևանում։ Մայրաքաղաքի 135 խաչմերուկներում տեսախցիկներ կան, մինչ տարվա վերջ կհայտնվեն ևս 20–ը։
«Այդ տեխնիկական միջոցները զգալիորեն ազդում են ՃՏՊ–երի քանակի վրա։ Դրանք տեղադրվել են այն վայրերում, ուր հաճախ էին ավտովթարներ տեղի ունենում», – ասաց Դանիելյանը։
Եթե նախկինում որոշ վարորդների «ատելությունն ու զայրույթը» ուղղվում էր ճանապարհային ոստիկանության աշխատակիցներին, ապա 2012 թվականից հետո, երբ սկսեցին արագաչափեր ու տեսախցիկներ տեղադրել, «ատելությունը» անցավ տեխնիկային, կատակեց գնդապետը։
Նրա խոսքով` ճանապարհային ոստիկանության աշխատակիցները հաճախ աչքերը փակում են փոքր խախտումների վրա ու տուգանքներ չեն գրում` սահմանափակվելով զգուշացումով։
Ճանապարհային ոստիկանության աշխատակիցն ուշադրություն դարձրեց, որ Հայաստանում պատահարների ու խախտումների մեծ մասն ամռանն է լինում։ Տուրիստական շրջանում ճանապարհները բեռնված են, մեքենաներն էլ արագ են ընթանում։ Ձմռանը պատահարների քանակը նույնպես ավելանում է, սակայն դրանք, հիմնականում, լուրջ հետևանքների չեն հանգում, քանի որ ընթացքի արագությունը փոքր է լինում։
Հիմա Ճանապարհային ոստիկանությունը պատրաստվում է սեպտեմբերի 1–ին։ Այդ օրը դպրոցների մոտ ճանապարհային ոստիկանության աշխատակիցներ են հերթապահելու։ Դպրոցների մոտակայքում նորացվում են ճանապարհային նշումները, ճանապարհային նշաններ են դրվում։
