ԵՐԵՎԱՆ, 18 օգոստոսի — Sputnik. Կենտրոն և Նորք-Մարաշ համայնքների ընդհանուր իրավասության դատարանում զինված խմբի գործով դատավարությանը ներկա էին բոլոր 20 ամբաստանյալները։ Նրանց փաստաբաններից ոմանք, թեև բացակայում էին նիստից, բայց դատարանը դա հիմք չհամարեց դատական նիստը հետաձգելու համար։
Փոխարենը նիստը հետաձգվեց այլ պատճառաբանությամբ` նիստին հրավիրված մեղադրյալ վկաները չէին ներկայացել։
Բանն այն է, որ նախորդ դատական նիստում որոշում էր կայացվել հարցաքննել մայր գործից անջատված մասով անցնող մեղադրյալներին։ Բայց նրանք նիստին չէին ներկայացել։
Դատավոր Արմեն Բեկթաշյանը հայտարարեց, որ դատարանը ծանուցումներ ուղարկել է, բայց հավաստիացումներ չի ստացել, ուստի չի կարող միանշանակ պնդել, որ հրավիրվածները ծանուցվել են։ Հենց այս հիմքով էլ որոշվեց սպասել ևս մեկ շաբաթ։
«Երբ հաջորդ դատական նիստին հարցաքննության կանչված մեղադրյալները կներկայանան դատարան, մենք կփորձենք նրանցից ճշտել նաև, թե ինչու այսօրվա նիստին չէին եկել։ Կտեսնենք` այդտեղ կա դիտավորություն, թե ոչ, եթե կա, ում կողմից։ Դրանից հետո նոր ինչ-որ եզրահանգումներ կանենք»,- Sputnik Արմենիայի հետ զրույցում ասաց փաստաբան Հայկ Ալումյանը։
Նշենք, որ ի տարբերություն փաստաբանի, դատին ներկա ամբաստանյալների հարազատները դատավարության պարբերական ձգձգումներում դիտավորություն են տեսնում` դատավորին մեղադրելով դատական պրոցեսն անհարկի ձգձգելու համար։
Դատական հերթական նիստն այսօր տևեց շուրջ 10 րոպե, հաջորդը նշանակվեց օգոստոսի 25-ին։
Հիշեցնենք, որ մեղադրական եզրակացության համաձայն` Վահան Շիրխանյանը, Արթուր Վարդանյանը և մյուս 18 ամբաստանյալները մեղադրվում են զինված խումբ կազմակերպելու ու դրան անդամակցելու համար։
Խմբում ներգրավված անձինք ձերբակալվել էին 2015թ. նոյեմբերի 25-ին` ՀՀ ազգային անվտանգության ծառայության աշխատակիցների իրականացրած հատուկ գործողության արդյունքում։
