Ալեքսեյ Ստեֆանով, Sputnik.
«Звездочка, звездочка, եկ մեզ մոտ», — փոքրիկները ձայն են տալիս շլացուցիչ ժպիտով աղջկան, որը դուրս է գալիս Մոսկվայի բարձրակարգ հյուրանոցներից մեկի վերելակից։ Հենց այս հյուրանոցում են տեղավորվել «Ты супер! Танцы» մրցույթի մասնակիցները: Աղջիկն արձագանքում է կանչին, բայց երեխաների հետ խոսում է մայրենի լեզվով` ասածը համեմելով տարբեր ժեստերով: Հարցնում եմ` որտեղից է ժամանել և պարզում, որ նա Հայաստանի ներկայացուցիչն է՝ Աստղիկ Մխիթարյանը:
«Փոքրիկները ոչ մի կերպ չէին կարողանում արտասանել Աստղիկ անունը, և ես անընդհատ ուղղում էի նրանց: Ես էլ որոշեցի անունը ռուսերեն թարգմանել` Звездочка: Հիմա աղջիկները միայն այդպես են անվանում Աստղիկին», — պատմեց երկու անուն ստացած մասնակցի և «Թռչունյան տուն» կրթահամալիր-մանկատան մանկավարժ Շուշանիկ Ալեքսանդրյանը: Հենց նա է Մոսկվա բերել մանկատան սաներից երկուսին՝ Աստղիկ Մխիթարյանին և Դավիթ Այվազյանին:
Մինչ մենք խոսում ենք ուսուցչու հետ, Աստղիկը գնում է ընկերոջը փնտրելու, նրանք երկուսով հայկական ժողովրդական պար են ներկայացնելու «Ты супер! Танцы» մրցույթում: Հյուրանոցում ինչ-որ մեկին գտնելը հեշտ գործ չէ, քանի որ այստեղ մոտավորապես 150 երեխա կա: Նրանք ժամանել են Ռուսաստանի և նախկին Խորհրդային Միության երկրների տարբեր անկյուններից:
«Մենք եկել ենք Գյումրիից՝ Հայաստանի մշակութային մայրաքաղաքից: Մեր քաղաքը շատ հարուստ է հայտնի մարդկանցով, այստեղ հայտնի գրողներ, դերասաններ, արվեստագետներ են ծնվել», — հպարտությամբ ասում է Շուշանիկ Ալեքսանդրյանը և պատմում իր սաների ճակատագրի մասին:
Դավիթն ու Աստղիկը 16 տարեկան են: Աստղիկը դեռ դպրոց է հաճախում, քանի որ 7 տարեկանում է դպրոց ընդունվել, իսկ Դավիթը սկսել է դպրոց հաճախել վեց տարեկանից: Այս տարի նա ընդունվել է Գյումրու գեղարվեստական ակադեմիայի թատերական արվեստի բաժին: Մանկատուն է եկել առաջին դասարանում, իսկ Աստղիկը «Թռչունյան տուն» կրթահամալիր-մանկատանն է հայտնվել հինգ տարի առաջ:
«Աստղիկը մեծ եղբայր ունի, որն այժմ ծառայում է բանակում: Շատ հաճելի էր, երբ նա եկավ մեզ Մոսկվա ճանապարհելու, շատ էր անհանգստանում քրոջ համար», — ասում է ուսուցիչը:
Վերջապես գալիս է Աստղիկը, նրա հետ նաև` Դավիթը: Քանի որ մրցակիցները ռուսերեն չեն խոսում, Շուշանիկ Ալեքսանդրյանը դառնում է մեր թարգմանիչը:
«Մանկուց սիրել եմ պարարվեստը: Վեց տարեկան էի, երբ մայրս ինձ տարավ առաջին պարապմունքին, այդ օրվանից ես անդադար պարապում եմ: Մեծ ձեռքբերումներից մեկը մեր պարային խմբի ելույթն է Գյումրիում անցկացված Միջազգային պարային մրցույթում, այդ ժամանակ մենք առաջին տեղը զբաղեցրինք»,- հպարտությամբ պատմում է Դավիթ Այվազյանը:
Ասում է, որ «Ты супер! Танцы» մրցույթի մասին իմացել է մանկատան տնօրենի շնորհիվ: Նա է լրացրել դիմումները և խնդրել Դավթին ու Աստղիկին կատարել երկու պար, մեկը՝ գնչուական, մյուսը` լեզգինկա: Ընտրող հանձնաժողովը հավանել է նրանց պարը և հրավիրել Մոսկվա:
«Մենք մեծ հաճույքով եկանք Մոսկվա, որպեսզի ցույց տանք այն ամենը, ինչ կարող ենք», — ասում է Դավիթը:
«Մենք Մոսկվա ժամանեցինք ոչ միայն մեծ հաճույքով, այլ նաև մեր ազգի և քաղաքի պատիվը բարձր պահելու համար», — ավելացնում է Աստղիկ Մխիթարյանը:
«Ты супер! Танцы» միջազգային մրցույթը, որն անցկացնում են ՆՏՎ հեռուստաընկերությունը և Sputnik գործակալությունն ու ռադիոն, կմիավորի Ռուսաստանի, ԱՊՀ-ի ու Բալթյան երկրների տարբեր անկյուններում բնակվող տաղանդավոր երեխաներին և նրանց նվիրական երազանքներն իրականացնելու հնարավորություն կտա։
