ԵՐԵՎԱՆ, 15 օգոստոսի — Sputnik. Այսօր, ժամը 17:33-ին ռուսական փրկարարական ինքնաթիռը 5-րդ թռիչքն է իրականացրել դեպի Խոսրովի այրվող անտառ։ Այս մասին հայտնում է ՀՀ արտակարգ իրավիճակների նախարարության մամուլի ծառայությունը։
«Ըստ թռիչքների նախնական արդյունքների ամփոփման՝ երկնքից հրդեհաշիջում կազմակերպելու շնորհիվ հնարավոր է եղել զգալի չափով կանխել կրակի տարածումը»,- հայտնում են նախարարությունից:
Այդուհանդերձ, հրդեհը դեռ մարված չէ, և չի բացառվում, որ «Իլ-76»-ը շարունակի հրդեհաշիջման թռիչքները:
Հիշեցնենք, ՌԴ ԱԻՆ հրդեհաշիջման «Իլ —76» ինքնաթիռը Երևանի «Էրեբունի» օդանավակայանից դեպի Խոսրովի անտառի տարածք հրդեհաշիջման թռիչքներ է սկսել իրականացնել այսօր վաղ առավոտից։ 4-րդ թռիչքը կատարվել էր 14:30-ի սահմաններում։
«ԻԼ-76» ինքնաթիռի ջրատարողությունը 42 տոննա է, և այն լիցքավորվում է Երևանի «Էրեբունի» օդանավակայանում՝ 10 տոննա տարողությամբ ջրատարների օգնությամբ:
