ԵՐԵՎԱՆ, 15 օգոստոսի – Sputnik. «Խոսրովի անտառ» պետական արգելոցի հրդեհված տարածքի մեծ մասը գտնվում է Արարատի մարզի վարչական տարածքում։ Եվ սպասելի էր այդ մարզի ղեկավարության արագ արձագանքը հրդեհի մարման աշխատանքներին։ Հատկապես, որ մարզի ղեկավարը բնապահպանության նախկին նախարար Արամայիս Գրիգորյանն է։ Սակայն, մեր տեղեկություններով, մարզի ղեկավարությունը շշմեցուցիչ անտարբերություն է ցուցաբերել հրդեհի և դրա մարման աշխատանքների հանդեպ։
Հրդեհի առաջին երկու օրը մարզպետարանի կողմից որևէ արձագանք չի եղել, մինչդեռ կարելի էր մոբիլիզացնել մերձակա բնակավայրի բնակիչներին, որպեսզի մասնակցեն հրդեհաշիջման աշխատանքներին։ Երրորդ օրը միայն մի քանի տասնյակ մարդիկ` մարզպետի գլխավորությամբ, գնացել են արգելոցի Ուրցաձորի տեղամաս, որտեղ այցելուների կենտրոնն է ու հրդեհաշիջման աշխատանքները կարգավորող շտաբը։
Մի որոշ ժամանակ այնտեղ մնալուց հետո մարզպետը գնացել է, ոմանց ասելով՝ գնացեք հրդեհված տարածք։ Իսկ նրա հետ եկած մարդիկ միառժամանակ մնացել են շտաբի տարածքում, ապա թողել, հեռացել` այդպես էլ չբարձրանալով հրդեհի վայր ու չմասնակցելով կրակի մարման աշխատանքներին։ Թե ինչու՞ է մարզի ղեկավարությունն այսպիսի պահվածք դրսևորել`մնում է անհասկանալի։
