ԵՐԵՎԱՆ, 14 օգոստոսի – Sputnik. Ռուսաստանի ԱԻՆ–ը Իլ–76 ինքնաթիռ կուղարկի Հայաստան` անտառային հրդեհների դեմ պայքարելու համար, Sputnik Արմենիային հայտնեցին ՌԴ ԱԻՆ մամուլի ծառայությունում։
«Տվյալ պահին բոլոր անհրաժեշտ փաստաթղթերն են ձևակերպվում», – Sputnik Արմենիային ասացին ԱԻՆ–ից։
Ի պատասխան Հայաստանի կառավարության հարցման` ՌԴ կառավարությունը հանձնարարել է Ռուսաստանի ԱԻՆ–ին Իլ–76 ինքնաթիռ տրամադրել` «Խոսրովի անտառ» պետական արգելոցում հրդեհաշիջման աշխատանքներ իրականացնելու համար:
Ռուսաստանի ԱԻՆ–ի Իլ–76 ինքնաթիռը միանգամից կարող է ավելի քան 42 տոննա ջուր լցնել հրդեհի օջախների վրա, նաև պատսպարման շերտ ստեղծել` 800 մետր երկարությամբ ու 60 մետր լայնությամբ։ Այն աշխարհի ամենախոշոր հակահրդեհային ինքնաթիռներից է։
Ռուսաստանի ԱԻՆ–ի Իլ–76 անձնակազմը պատրաստված է դժվար պայմաններում աշխատանքի համար ու բնական հրդեհների մարման մեծ փորձ ունի, բազմիցս մասնակցել է արտակարգ իրավիճակների վերացմանը Ռուսաստանի Դաշնության տարածքում ու արտասահմանում։
Ավելի վաղ Հայաստանի ԱԻ նախարարը դիմել է ռուս գործընկերոջը` հրդեհաշիջման համար հատուկ ինքնաթիռ տրամադրելու խնդրանքով։
2017թ. օգոստոսի 12-ին՝ ժամը 12:10-ին, Վեդիի հրշեջ փրկարարական ծառայությունից ահազանգ է ստացվել, որ նույն օրը` ժամը 11:30-ի սահմաններում հրդեհ է բռնկվել «Խոսրովի անտառ» «Զիմնի» կոչվող հատվածում և հարակից տարածքներում։ Նախնական տվյալներով՝ 200-250 հա տարածքում այրվում է բուսածածկ և անտառածածկ տարածք:
Դեպքի առթիվ հարուցվել է քրեական գործ ՝ ՀՀ քրեական օրենսգրքի 297-րդ հոդվածի 1-ին մասի և 186-րդ հոդվածի 2-րդ մասի հատկանիշներով, ձեռնարկվում են անհրաժեշտ քննչական և դատավարական այլ գործողություններ՝ հրդեհի առաջացման պատճառը պարզելու համար։
