ԵՐԵՎԱՆ, 14 օգոստոսի – Sputnik. Ռուսաստանի ԱԻՆ–ի Իլ–76 ինքնաթիռն ուղևորվել է Հայաստան` հրդեհաշիջման աշխատանքներում օգնություն ցուցաբերելու համար, Sputnik Արմենիային հայտնեցին ՌԴ ԱԻՆ մամուլի ծառայությունը։
«Ինքնաթիռը թռել է ժամը 15:15–ին (երևանյան ժամով 16:15) Մոսկվայի մոտակայքի Ռամենովսկի շրջանից», – ասացին մամուլի ծառայությունից։
Ժամանելուց անմիջապես հետո Ռուսաստանի ԱԻՆ–ի օդանավը կսկսի մարել այն տարածքների կրակը, ուր ամենածանր իրավիճակն է ստեղծվել։
ՌԴ ԱԻՆ–ի ինքնաթիռն Էրեբունի օդանավակայանում վայրէջք կկատարի տեղական ժամանակով 19:20։
Ռուսաստանի ԱԻՆ–ի Իլ–76 ինքնաթիռը միանգամից կարող է ավելի քան 42 տոննա ջուր լցնել հրդեհի օջախների վրա, նաև պատսպարման շերտ ստեղծել` 800 մետր երկարությամբ ու 60 մետր լայնությամբ։ Այն աշխարհի ամենախոշոր հակահրդեհային ինքնաթիռներից է։
Ռուսաստանի ԱԻՆ–ի Իլ–76 անձնակազմը պատրաստված է դժվար պայմաններում աշխատանքի համար ու բնական հրդեհների մարման մեծ փորձ ունի, բազմիցս մասնակցել է արտակարգ իրավիճակների վերացմանը Ռուսաստանի Դաշնության տարածքում ու արտասահմանում։
Ռուսաստանի ԱԻՆ ինքնաթիռ ուղարկելու մասին որոշումը կայացվել է հայկական կողմի պաշտոնական խնդրանքից հետո։
Հայաստանի Արարատի մարզում «Խոսրովի անտառում» Երևանից 61 կմ դեպի հարավ–արևելք խոշոր հրդեհ է սկսվել օգոստոսի 12–ին։ Կրակը հարյուրավոր հեկտարներ է ընդգրկել։
