Աննա Վարդանյան, Sputnik.
Հրդեհներն անդառնալի վնաս պատճառեցին Հայաստանի կենսաբազմազանությանը: «Էկո մեդիա» բնապահպան լրագրողների ակումբի համահիմնադիր անդամ Նարինե Կիրակոսյանը Sputnik Արմենիային տեղեկացրեց, որ եղանակային անբարենպաստ և դժվար ու անանցանելի ռելիեֆի պայմաններում, նաև հակահրդեհային ժամանակակից համակարգերի ու միջոցների բացակայությամբ, որքան էլ որ մեր փրկարարներն ու պետական մյուս գերատեսչությունների աշխատակիցները պրոֆեսիոնալ լինեն, դժվար ու գրեթե անհնար է կրակի դեմ առնելը:
Ականատես լրագրողի խոսքով Արտավանում հրդեհը ոչնչացրել է մոտ 700 հա տարածք: «Ամենասարսափելին այն է, որ այդ տարածքի մոտ կեսը երկու դար ապրած գիհիների նոսրաանտառ է: Որոշ գիհիներ անհետացման եզրին են և գրանցված են կամիր գրքում: Դրանք բնության մեջ գրեթե չեն վերականգնվում: Վերականգնման համար անհրաժեշտ է մարդու օգնությունը: Իսկ 270 հեկտար տնկելը հեշտ բան չէ»,- ասում է Նարինե Կիրակոսյանը:
Նարինե Կիրակոսյանը Արտավանում ականատես եղել կենդանիների՝ վառված թաթիկներով նապաստակների ու միջատների փախուստին կրակի ճիրաններից: Բնապահպան լրագրողների ամենատես աչքից չի վրիպել նույնիսկ անգղը՝ վառված օձը բերանին: Նրանց տեսախցիկը ֆիքսել է նաև արջի թարմ հետքեր, իսկ դա, ըստ բնապահպանների, խոսում է այն մասին, որ խոշոր կաթնասունը ևս դիմել է փախուստի:
Նարինե Կիրակոսյանի խոսքով`այս հրդեհներն աննախադեպ են ու ահռելի վնաս են տվել կենդանական ու բուսական աշխարհին, քանի որ հանդիսանում են էկո միջանցք վայրի կենդանիների տեղաշարժի համար և Արարատյան դաշտավայրը, Գեղամա լեռնաշղթան կապում են Զանգեզուրի հետ:
