ԵՐԵՎԱՆ, 13 օգոստոսի — Sputnik. Խոսրովի արգելոցում հրդեհաշիջման աշխատանքներն առայժմ արդյունք չեն տալիս։ ՀՀ բնապահպանության նախարար Արծվիկ Մինասյանը, ՀՀ ԲՆ աշխատակազմի ղեկավար կազմը, նախարարության, բնապահպանական տեսչության բազմաթիվ աշխատակիցներ արդեն երկրորդ օրն է՝ Խոսրովի արգելոցում են, Sputnik Արմենիային հայտնեց բնապահպանության նախարարի մամուլի խոսնակ Մարինե Կարապետյանը։
«Պայքարը կրակի դեմ շարունակվում է, շոգ եղանակը նպաստում է դրա տարածմանը»,- ասաց Մարինե Կարապետյանը։
Թե արգելոցի տարածքից որքան հատվածն է կրակի թիրախ դարձել, տվյալները ճշտվում են։ Այսօր առավոտյան հրապարակված տվյալներով՝ կրակն ընդգրկել էր 200-250 հա բուսածածկ և անտառածածկ տարածք:
Հիշեցնենք, որ ըստ ԱԻՆ տեղեկատվության` օգոստոսի 12-ին, ժամը 12:30-ին ահազանգ էր ստացվել, որ Արարատի մարզի Ուրցաձոր գյուղից մոտ 20 կմ հյուսիս՝ «Խոսրովի անտառ» պետական արգելոցի «Զիմա» կոչվող տեղամասում, այրվում է բուսածածկ տարածք:
