ԵՐԵՎԱՆ, 8 օգոստոսի– Sputnik. Շամրիամ գյուղում օգոստոսի 1-ին կատարված սպանության համար հետախուզվող Թելման Քալաշյանը 2013թ–ին տոկոսով 75 000 դոլար գումար է պարտք տվել ռուսաստանաբնակ համագյուղացի եղբայրներին։ Առաջին 2 տարվա ընթացքում Քալաշյանն անխափան ստացել է պարտքի տոկոսները։ Բայց 2015թ–ին եղբայրների բիզնես ծրագրերը խափանվել են և նրանք չեն կարողացել վերադարձնել ո՛չ պարտքի մայր գումարը, ո՛չ էլ տոկոսները։
Կատարված հանցագործության դրդապատճառների մասին մանրամասներ է հայտնում ՀՀ Քննչական կոմիտեն։
Թելման Քալաշյանը 100 000 դոլար է պահանջել եղբայրներից` որպես պարտքի և տոկոսների փոխհատուցում` պարբերաբար սպառնալիքներ հնչեցնելով պարտապանների ու նրանց հարազատների հասցեին։
Վերջին նման խոսակցությունը եղբայրների հարազատների հետ տեղի է ունեցել դեպքի օրը։
Ավելի ուշ արդեն Շամիրամ գյուղի գերեզմանոցի տարածքում պարտապանների հարազատների վրա կրակելուց, չորս հոգու սպանելուց ու 7 հոգու վիրավորելուց հետո Քալաշյանը փախուստի է դիմել իր «Նիվա» ավտոմեքենայով, իսկ դրա վթարվելուց հետո` հորեղբոր ավտոմեքենայով։
Քննչական կոմիտեն հայտնում է, որ Քալաշյանի հորեղբայրը դեպքից մեկ օր անց ներկայացել է ոստիկանություն և ձերբակալվել` հանցագործին պարտակելու մեղադրանքով։
Թելման Քալաշյանին շարունակում են փնտրել։
Նախաքննական մարմինը բացահայտել է նաև, որ զոհերի ու վիրավորների թվում Թելման Քալաշյանից պարտք վերցրած անձինք չկան, նրանց հարազատներն են։
Հիշեցնենք, որ օգոստոսի 1–ին ժամը 10.40-ին ոստիկանություն ահազանգ է ստացվել, որ Արագածոտնի մարզի Շամիրամ գյուղի գերեզմանատանը կրակոցներ են հնչել:
Մեկնած օպերատիվ խումբը պարզել է, որ անհայտ անձը մտել է գերեզմանատան տարածք և կրակ բացել հավաքվածների վրա: Կրակոցների հետևանքով զոհվել էր 4 մարդ, վիրավորվել՝ 7-ը:
