ԵՐԵՎԱՆ, 8 օգոստոսի – Sputnik. Սև ծովի նշանակությունը Միացյալ նահանգների աչքին զգալիորեն աճել է, ասաց թուրքագետ Ռուբեն Սաֆրաստյանը։
Նրա խոսքով` Ռուսաստանի ու ԱՄՆ–ի հարաբերությունների սրացման պայմաններում կա մի քանի գործոն, որոնք կարևոր են մեր տարածաշրջանի համար։
«Կարծում եմ, ԱՄՆ–ի արտաքին քաղաքականությունն աճող ճնշում է զգում զինվորականների կողմից։ Դա նոր երևույթ է ու կապված է Թրամփի նախագահության հետ», – ասաց Սաֆրաստյանը։
Թրամփը հայտնում էր, որ ավելի շատ ուշադրություն է դարձնելու զինված ուժերին։ Այդ գործընթացը, փորձագետի խոսքով, արդեն նկատվում է։
ՆԱՏՕ–ի շրջանակում Վրաստանի վարժանքները, որոնցում Հայաստանը նույնպես մասնակցում է, Սաֆրաստյանի խոսքով, կազմում են շատ ավելի լայնածավալ զորավարժությունների մի մասը, որոնք անցնելու են Սև ծովի ավազանի ամբողջ երկայնքով։
«Սև ծովը մեծ նշանակություն է ստանում ԱՄՆ–ի արտաքին քաղաքականության համար։ Այդ առումով մեծանում է Վրաստանի նշանակությունը, որը միակ հարավարևելյան պետությունն է, որը ելք ունի դեպի Սև ծով»,– նշեց Սաֆրաստյանը` ուշադրություն դարձնելով, որ ԱՄՆ նախագահը ներկա է եղել վարժանքների անցկացմանը Վրաստանում։
Փորձագետն այդ «զուգադիպությունը» համարում է ոչ պատահական ու աննախադեպ։
