ԵՐԵՎԱՆ, 8 օգոստոսի – Sputnik. Երևանի ու Թեհրանի հարաբերությունները դարձել են Հարավային Կովկասի կայունությունն ապահովող գործոններից մեկը, այսօր մամուլի ասուլիսի ժամանակ ասաց թուրքագետ Ռուբեն Սաֆրաստյանը։
«Թուրքիայի ռազմավարական դիրքերի թուլացումը Հարավային Կովկասում կհանգեցնի Իրանի դերի ու նշանակության մեծացմանը», – ասաց Սաֆրաստյանը։
Այս համատեքստում, թուրքագետի խոսքով, չի կարելի թերագնահատել Հայաստանի նախագահ Սերժ Սարգսյանի մասնակցությունը Իրանի նախագահ Հասան Ռոհանիի երդմնակալության արարողությանը։ Համաշխարհային լրատվամիջոցները ուշադրություն են դարձել այն բանին, որ Սարգսյանը Հարավային Կովկասի երկրներից միակ ներկա նախագահն էր։
Դա վկայում է այն մասին, որ Հայաստանի ու Իրանի հարաբերությունները անցել են երկկողմանի փոխներգործության ձևաչափը` դառնալով տարածաշրջանային նշանակություն ունեցող գործոն։
«Այս հարաբերությունները տարածաշրջանի համար կայունացնող գործոն են դարձել», – ասաց Սաֆրաստյանը։
Նա նշեց, որ Ադրբեջանն, իր հերթին, փորձում է վերանայել իր տարածաշրջանային քաղաքականությունը։ Մի կողմից` Ալիևը չի մասնակցում Ռոհանիի երդմնակալության արարողությանը, այսպիսով ազդանշան տալով ԱՄՆ–ին ու Արևմուտքին, մյուս կողմից էլ` վերջին պահին հրաժարվում է մասնակցել Վրաստանում ՆԱՏՕ–ի վարժանքներին։
«Իսկ դա արդեն «մեսիջ» էր Ռուսաստանին, այս քայլով նա ցույց է տալիս հեռացումը ՆԱՏՕ–ից։ Ադրբեջանը դիվանագիտական հնարքներով փորձում է իր համար տարածաշրջանում ավելի բարենպաստ դաշտ ստեղծել», – ասաց Սաֆրաստյանը։
Թուրքագետը համոզված է`Բաքվում սպասում են, որ այս աշնանը ԵԱՀԿ Մինսկի խումբը ակտիվություն կցուցաբերի, ու նրանք ցանկացած «ռեվերանսներով» համանախագահ երկրների առջև փորձում են ամրացնել իրենց դիրքերը բանակցային գործընթացում։
