ԵՐԵՎԱՆ, 7 օգոստոսի – Sputnik. Հայաստանի բնակչության գերիշխող մասը չի պատրաստվում լքել երկիրը, այս մասին են վկայում «Միգրացիոն հարցերը Հայաստանի նոր կառավարության աշխատանքի համատեքստում» հարցման արդյունքները, որն անցկացրել են «Ժողովրդի ձայնը» ՀԿ–ի փորձագետները։
Հարցումը, ինչպես նշեց Արման Ղուկասյանը, նպատակ ուներ բացահայտել միգրացիայի հարցով հասարակության տրամադրությունները։
Հայաստանի կառավարությունը մի շարք ձեռքբերումներ է գրանցել ԵԱՏՄ–ի կազմում, ինչը դրական ազդեցություն է ունեցել երկրի միգրացիոն իրավիճակի վրա, համոզված է Ղուկասյանը։
«Շատ փորձագետներ 2,5-3 տոկոս տնտեսական աճ են ակնկալում մինչ 2017 թվականի վերջ` Հայաստանի կառավարության կողմից իրականացված մի շարք արդյունավետ քայլերի շնորհիվ։ Մենք համոզված ենք, որ կառավարությունը ճիշտ քաղաքականություն է վարում Միության շրջանակում` օգտագործելով դրա ողջ ներուժը», – ասաց Ղուկասյանը։
«Վերջին հինգ ամիսները կարելի է բարեհաջող համարել հայկական տնտեսության համար։ Արտահանման աճը 21% է կազմել, ընդ որում` խոսքը տարեկան արտադրանքի մասին է, ինչը, փորձագետի խոսքով` վկայում է բնակչության զբաղվածության աճի մասին։
«Հույս ունենք, որ նման հաջողությունների պարագայում 2018 թվականի հունվարից հնարավոր կլինի միգրացիայի նվազում արձանագրել»,- նշեց Ղուկասյանը։
Ղուկասյանը նաև ուշադրություն դարձրեց 12,8%–ով առևտրի ծավալի աճին, նաև ռուսաստանցի զբոսաշրջիկների հոսքի աճին (25%), ինչը պայմանավորված է այն հանգամանքով, որ Ռուսաստանի քաղաքացիները հնարավորություն են ստացել Հայաստան այցելել ներքին անձնագրերով։
Հարցման տվյալները վկայում են, որ բնակիչները չեն ցանկանում Հայաստանը լքել և հույս ունեն, որ երկրում սոցիալական ու տնտեսական իրավիճակը կլավանա, ասաց Արման Ղուկասյանը։
Հարցմանը մասնակցել է Երևանի 900 բնակիչ, որոնց 25% գրանցված են մարզերում։ Հարցվածների 75%–ը 18–ից 35 տարեկան երիտասարդներ են։ Հարցմանը մասնակցած քաղաքացիների 72%–ը անկուսակցական են։
«Այն հարցին, թե պատրաստվում են արդյո՞ք նրանք մշտական բնակություն հաստատել այլ երկրներում, հարցվածների 72%–ը պատասխանել է «ոչ», 19 %–ը` «չգիտեմ», իսկ 9%` «այո»,– ասաց ասուլիսի մյուս մասնակիցը` «Ժողովրդի ձայն» ՀԿ փորձագետ Ծովինար Կոստանյանը։
Հարցումը չի բացահայտում, թե արդյո՞ք հարցմանը մասնակցածների մեծամասնությունը հնարավորություն ունի դուրս գալ երկրից։ Սակայն, Կոստանյանի խոսքով` հաջորդ հարցը` ակնկալում են նրանք արդյո՞ք առաջիկայում սոցիալական ու տնտեսական ոլորտում բարեփոխումներ, մասամբ լույս է սփռում իրավիճակի վրա։
Այդ հարցին դրական են պատասխանել հարցվածների 79%–ը, 15%–ն ասել է «ոչ», 6% –ը դժվարացել են պատասխանել։
Կոստանյանը պարզաբանեց Sputnik Արմենիային, որ խոսքը, հիմնականում, նոր աշխատատեղերի ստեղծման ու աշխատավարձերի բարձրացման մասին է։
Բացի այդ, հարցվածների 78%–ը հնարավոր բարեփոխումները կապել է Հայաստանի ԵԱՏՄ–ին անդամակցության հետ, 62%–ը` կառավարության աշխատանքի, 38%–ը `Սփյուռքի ներդրումների և 26%–ը` Հայաստան – ԵՄ հարաբերությունների խորացման հետ։
Ղուկասյանն ու Կոստանդյանը ավելացրել են, որ հարցումներ կանցկացվեն նաև Հայաստանի մարզերում։
