ԵՐԵՎԱՆ, 5 օգոստոսի — Sputnik. Օգոստոսի 8-22-ը տեղի կունենա Հայաստանի 78-րդ առաջնության առաջին խմբի մրցաշարը, հայտնում է Հայաստանի շախմատային ֆեդերացիայի պաշտոնական կայքը:
Մրցաշարը կանցկացվի Երևանում` 14 մասնակիցներով, շրջանային մրցակարգով, ՖԻԴԵ-ի շախմատի մրցաշարային կանոնների համաձայն:
Կիրառվելու է Ֆիշերի ժամակարգը. 90 րոպե կտրվի առաջին 40 քայլի համար, այնուհետև 30 րոպե` մինչև պարտիայի ավարտը, յուրաքանչյուր քայլին` 30 վայրկյան հավելումով, սկսած առաջին քայլից:
1-3-'x տեղեր գրաված շախմատիստները իրավունք են ստանում մասնակցելու Հայաստանի 78-րդ առաջնության բարձրագույն խմբի մրցաշարին:
Հավասար միավորներ վաստակելու դեպքում տեղերը որոշվում են ըստ.
1. Զոնեբորն-Բերգերի գործակիցների, 2. սև գույնի ֆիգուրներով խաղացած պարտիաների առավելագույն քանակի, 3. անձնական հանդիպման արդյունքի, 4. հաղթանակների առավելագույն քանակի:
Խաղից ուշանալու թույլատրելի ժամանակը` 15 րոպե տուրի սկզբից:
