ԵՐԵՎԱՆ, 5 օգոստոսի — Sputnik, Ամալյա Պապյան. Հավանաբար, շատերը գիտեն, որ Ջորջ Գորդոն Բայրոնը եղել է հայտնի կնամոլ: Վենետիկում նա մեկ տարվա ընթացքում գերել է 250 կնոջ սիրտ: Սա Բայրոնի բարի զբաղմունքներից մեկն էր և քանի որ ի վիճակի չէր հիշել բոլոր կանանց, ուներ հատուկ մատյան, ուր գրանցում էր այն երջանիկների անունները, ում նա էր երջանկացրել:
Գերված կանանց անվան կողքին էլ փակցնում էր նրանցից վերցրած մազափունջ: Համաձայնեք՝ պարադոքսալ հավաքածու: Բավական մեծ հավաքածու ունենալուն չեն խանգարել ոչ նրա փոքր-ինչ կաղ լինելը և ոչ էլ գիրանալու հակում ունենալը:
Նրա ամենաճանաչված աշխատանքների թվում է որոշ ինքնակենսագրական տարրեր պարունակող սկանդալային «Դոն Ժուան» պոեմը:
Ի դեպ, Բայրոնն առաջին հայագետներից է. Վենետիկի Սուրբ Ղազար կղզում գտնվող Մխիթարյան Միաբանության վանականներից նա սովորել էր հայերեն, նրա օգնությամբ անգլերենից հայերեն և հայերենից անգլերեն են թարգմանվել մի շարք կրոնական և աշխարհիկ ձեռագրեր, ստեղծվել է անգլերեն-հայերեն բառարան։
Բայրոնի ստեղծագործությունները բարձր են գնահատել այնպիսի հայ գրողներ, ինչպիսիք են Ղևոնդ Ալիշանը, Հովհաննես Թումանյանը:
