ԵՐԵՎԱՆ, 4 օգոստոսի — Sputnik. Բրազիլացի հարձակվող Նեյմարը պաշտոնապես լքել է կատալոնական «Բարսելոնան» և դարձել ազատ գործակալ, տեղեկացնում է armsport.am-ը: Ֆրանսիական ՊՍԺ-ն պաշտոնապես հայտարարել է բրազիլացի հարձակվող Նեյմարի հետ պայմանագիր կնքելու մասին: Կողմերի միջև կնքված պայմանագրի ժամկետը նախատեսված է մինչև 2022 թվականը:
Ավելի վաղ կատալոնական «Բարսելոնան» հայտարարել էր, որ Նեյմարի ներկայացուցիչները վճարել են ֆուտբոլիստի հրաժարագինը, որը կազմում էր 222 մլն եվրո: Դա ռեկորդային արժեք է ֆուտբոլի համար:
Ըստ լրատվամիջոցների` Նեյմարը փարիզյան ակումբում կստանա տարեկան 30 մլն եվրո աշխատավարձ: Հարձակվողը մտադիր է Ֆրանսիայի 2017-18 թ.թ. առաջնության մեկնարկային տուրում մասնակցել «Ամյենի» հետ հանդիպմանը:
Ավելի վաղ ֆուտբոլի պատմության ամենաթանկարժեք ֆուտբոլիստը Պոլ Պոգբան էր, որը 2016 թվականին 105 մլն եվրոյի դիմաց Թուրինի «Յուվենտուսից» տեղափոխվել էր անգլիական «Մանչեսթեր Յունայթեդ»:
Ֆուտբոլի պատմության 5 ամենաթանկ ֆուտբոլիստները
1. Նեյմար` 222 մլն եվրո («Բարսելոնա» — ազատ գործակալ, ամենայն հավանականությամբ` ՊՍԺ-ի ֆուտբոլիստ)
2. Պոլ Պոգբա` 105 մլն եվրո («Յուվենտուսից»` «Մանչեսթեր Յունայթեդ»)
3. Գարեթ Բեյլ` 101 մլն եվրո («Տոտենհեմից»` Մադրիդի «Ռեալ»)
4. Կրիշտիանու Ռոնալդու` 94 մլն եվրո («Մանչեսթեր Յունայթեդից»` Մադրիդի «Ռեալ»)
5. Գոնսալո Իգուաին` 90 մլն եվրո («Նապոլիից»` «Յուվենտուս»)
