ԵՐԵՎԱՆ, 4 օգոստոսի – Sputnik. Ռուսաստանի ու ԱՄՆ–ի հարաբերություններում նոր «խիստ» փուլը, անպայման, կանդրադառնա Ռուսաստանի դաշնակից երկրների, այդ թվում` Հայաստանի վրա։ Այս մասին լրագրողների հետ հանդիպման ժամանակ ասել է Աշխարհաքաղաքական ակադեմիայի նախագահ Արայիկ Սարգսյանը։
Նրա խոսքով` Ռուսաստանը վտանգ է տեսնում դեպի արևելք ընդլայնվող ՆԱՏՕ-ի կողմից։ Հենց դրանով են պայմանավորված Ռուսաստանի գործողությունները, այդ թվում` Ռուսաստանի կողմից Ղրիմի վերադարձը, Սիրիայում իրականացվող ռազմական գործողությունները։
«Կովկասյան երկրներում ու Արցախում այդ հակամարտության արձագանքը շուտ կզգացվի»,– ասաց Սարգսյանը։
Ակադեմիկոսը նշեց նաև, որ ԱՄՆ-ի ու Ռուսաստանի հարաբերությունները նման են պայմանավորված թաքուն խաղի, և որ ԱՄՆ ներկայիս նախագահ Դոնալդ Թրամփին իշխանության են բերել ԱՄՆ ազգայնական ուժերը, ովքեր ուզում են վերականգնել ԱՄՆ-ի դիրքերն աշխարհում՝ որպես համար մեկ պետություն»։
Թեև Ռուսաստանն այսօր զբաղված է այս և այլ խնդիրներով, այն ցանկացած պահի կարող է վերականգնել իր աշխարհաքաղաքական ազդեցությունը Կովկասում։
Ինչպես են մարտահրավերներն ազդում Հայաստանի ու Արցախի վրա
Սարգսյանը չի բացառում, որ մինչև այս տարվա դեկտեմբեր եվրոպական երկրներից մեկը կարող է ճանաչել Արցախի անկախությունը։
«Դա կարող է լինել Մակեդոնիան։ Եթե գրագետ աշխատանք տարվի այդ ուղղությամբ, ապա քրիստոնեական երկրներից մեկը կարող է ճանաչել Արցախի անկախությունը, սակայն վտանգն այն է, որ վերջին տարիներին Մակեդոնիայում ուժեղացել է թուրքական լոբբին», – նշեց Սարգսյանը։
Թույլ Հայաստանը, նրա խոսքով, ձեռնտու է մի շարք պետությունների, այդ թվում` գերտերությունների։ Փորձագետը կոչ արեց օգտագործել բոլոր ֆինանսական, տեխնիկական, դիվանագիտական հնարավորությունները`մեր երկրի զարգացման համար։
